Northeast State temi PM Modi den tesentaktep tajung ayutsüla: TR Zeliang

March 31, 2016 nü Bokajan Town nung Nagaland Chief Minister, TR Zeliang aser Human Resource Development Union Minister, Smt Smriti Irani na ajurutepba noksa nung angur.

Bokajan, March 31 (TYO) : Prime Minister Narendra Modi-i Northeast State tem atema alizüng aser sentong tajung aika atongba atema Nagaland Chief Minister TR Zeliang-i Modi nem tenüngsang agütsü.
State sorkartemi PM aser Centre nung par yimten telok den tesentaktep tajung yura NE State tem kanga ajangzüktsü, ta TR Zeliang-i ashi.
Bokajan Assembly Constituency nungi BJP candidate, Dr Numal Momin atema Brihostibarnep nüboyimba sentong ka nung TR Zeliang-i iba onük jembi.
Bokajan jila nung ayongzüka agiba sentong nung Nagaland Chief Minister-i Union Minister for HRD, Smriti Irani den külemi sabang ka nung noktaker shilem agia liasü.
Centre nung Congress-i aniba UPA sorkar alidang “Look East” asalentong liasü saka tang BJP-i aniba NDA sorkari “Act East” asalentong melen aser ita shia Union Minister temi NE State anabosa semdangtsü inyakyim tenzük, ta TR Zeliang-isa metetdaktsü.
“NE State tem teimbaka rongsen peria mali anungji State sorkartemi Centre nung NDA den tesentaktep tajung yura, NE nübortem ajangzüktsü” ta paisa ashi aser sentong nung adenertem dang BJP candidate Dr Momin nem vote agütsütsü mepishia metetdaktsü.
“Dr Numal Momin ya lanur aser tashitait lennir ka lir aser pai sensaker aser tangar memenepertem ajungkettsü atema mapa inyaktettsü. Nenoki pa shimra, pai Prime Minister den külemi inyaktetsü, kechiyong Modi-i Union Minister aser Chief Ministerial candidate Sonowal amala lanur lennirtem shimogo” ta Nagaland chief minister-isa metetdaktsü.
“Asenok state balala nungi süaka, Naga nunger aser Bokajan o Diphu nung alirtemi Dimapur nung aliba Airport, Railway aser shishilembadak ka dang lemsateper. Alemli nungi asenok külemi kibong ka ama dang liyonga arur aser maneni yamaji liyonga aotsü” ta paisa shisem.
Assam aser Nagaland tsüngda arrtsü mangatettep atema jembidang TR Zeliang-i ashiba agi, Nagaland sorkari Ministry of Home Affairs dang iba onük ya timi angatetteptsü atema tezülu agütsü saka Assam nung Congress sorkari okadak nung dang bendangtsü atema ken o benok aser iba jagi tanü tashi state anaprong nung nübortem timtemer, ta shisem.
Paisa ashiba agi, “Assam nung BJP-i sorkar tashi abentsüsa kümra, parnoki mangatettep ken o tem timi angatetteptsü inyaktsü ta ni amanger aser iba jagi Naga aser Assam nunger yimjung nung liyonga aotsü.”
2003 nungi NPF-i NDA den yaritepa arur aser onoki tanü tashi BJP den yariteper, kechiyong onoki mangdang aser shisatsü aketba lennir Prime Minister Modi dak nungi aika imlar, ta TR Zeliang-isa metetdaktsü.
Tanü sentong nung Nagaland Home Minister, Y Patton-ia o jembidang, “onoki Congress party agienogo aser taruba general elections (2018) nung Congress-i Assembly nung züngsem ka yoktsüjia kanga tasak asütsü” ta ashi.
“Nagaland-i Congress telok magizüker kechiyong iba telok ya tanü putu den meputep ta onoki ajitet. Assam nungi Rajya Sabha MP ka küm 10 atema Prime Minister inyakogo, saka pai nür state atema kechi inyaktsü? Pa Prime Minister inyakdang pai nür state kwiben semdanga lir?” ta Patton-isa telok dang asüngdang.
“Tanep yangi sentepa alirtem rongnung Congress tsütsü rangloker kar danga lira, iba tangsa tang iba tangatetbaji melenshiang aser BJP candidate Dr Momin nem vote agüjang ta ni ayongzüker” ta Nagaland Home Minister-isa metetdaktsü.
Tanep Bokajan nung ayongzüka agiba nüboyimba sentong nung Nagaland nungi Parliamentary Secretary kar, NPF party tanishirtem aser Nagaland BJP Unit President Visasolie Lhoungu-i anir BJP züngsem aika aden.