Northeast tzümetsüng nung yariteptsü atema sen crore 2000 agütsür

Guwahati, August 1 (Agencies): Mongulbarnü Prime Minister Narendra Modi-i Northeast nung tzümetsüng timtem ajurua aliba state tem nem sen crore 2,000 dak tema teyari agütsütsü nangzükogo.
Senji relief, rehabilitation, reconstruction aser flood mitigation measures atema agütsütsü ta pai ashi.
Tanü Prime Minister-i Assam, Arunachal Pradesh, Nagaland, Manipur aser Mizoram nung tzümetsüng timtem atema senden balala amen.
Assam finance minister Himanta Biswa Sarma-i ashiba agi, Prime Minister-i Assam nung tzümetsüng ajanga takok ngua alirtem yaritsü asoshi sen crore 250 talila agütsüsemtsü nangzükogo.
Tanü Prime Minister Modi-i Assam, Arunachal Pradesh, Manipur aser Nagaland state tem nungi Chief Minister aser tongti ketdangsertem den senden balala amen. Senden nung Mizoram Chief Minister medentet aser pai Modi dangi shidi ka zülu.
Centre sorkari Northeast nung infrastructure sector atema dang sen crore 1200 agütsütsü. Iba senji gari lenmang, train lenmang, highways, apu aser tanga infrastructure raksa alibatem yanglutsü atema lir.
Centre-isa Brahmaputra River nung water holding capacity tajungba kümdaktsütsü sen crore 400 agütsütsü.
Taküm financial year atema Centre-i SDRF nungi sen crore 600 central share ama agütsütsü mulunga agizük. Iba nungjagi state tem nem sen crore 345 agütsüogo aser tanüngbaji NE state tem nung relief & rehabilitation atema tekaratiba nung agütsütsü.
Maneni northeast tesem nung tzümetsüng timtem koktettsü atema lenmang bushiteptsü aser mapa inyaktsü atema sen crore 100 agütsütsü.
North-East tesem water resources timi anepalutsü atema Centre sorkar kübok Ministry tem nungi High Level Committee ka tentettsü.
Prime Minister’s National Relief Fund (PMNRF) kübok tzümetsüng nung asür shia kinunger nem sen lakh 2 aser kanga mejungi yirur nem sen meyirjang 50 agütsütsü lemzüktsüogo.

Nagaland CM-i sen crore 700 teyari meshi
Guwahati, August 1 (Agencies): Nagaland Chief Minister, T R Zeliang-i taküm tzümetsüng lendong nung takoksa anguba atema prime minister dang sen crore 700 teyari meshi.
“Onoki takoksatem asadangogo aser ibaji sen crore 700 tema lir. Anungji infrastructure yanglushitsü aser tanga nüngdaktem atema onoki sen crore 700 teyari nüngdaker” ta tanü PM Modi den ajurutepa senden amenba sülen TR Zeliang-i osangbener dang ashi.
Taküm Nagaland nung tzümetsüng ajanga lendong balala nung nisung 18 asü, nisung lakh 6 shi timtem ajuru aser tzümetsüng ajanga yimtsüng 6,000 shi kongshi, ta TR Zeliang-isa metetdaktsü.
“Taküm tzümetsüng timtem kanga mejungi ajuruogo. Tesem aika nung tzümetsüng aser anentsüh lendong atalok. Tang tashi nübortem timtemdar” ta paisa shisem.
“Prime Minister-i north east nung chief minister ajak den ajuruteptsü arubaji kanga junger aser onok ajungmesor. Iba ya inyakyim tajung ka lir” ta Nagaland Chief Minister-isa ashi.