Northeast U-16 lanurtem nem cricket coaching agütsüdar

Nagaland Cricket Stadium, Dimapur nung north east coaching camp nung International cricket asayar, Cheteshwar Pujara North East U-16 cricket asayartem den tangokba noksa nung angur. Noksa nung cricket association ketdangsertem aser National Cricket Academy nungi coach tema angur.

Dimapur, May 18 (TYO) : Tang north east tesem nung alir under-16 cricket asayartem nem National Cricket Academy (NCA) lenisüba kübok coaching camp ka Nagaland Cricket Stadium, Dimapur nung tagütsüdak lir aser iba camp atema nüngdakba sen-o-tzü ajak BCCI-i agütsür. Tang India nungi international cricket asayar Cheteshwar Pujara-i iba camp semdanga lanurtem nem tesayuba aika agütsüba den parnok den mener nüngdakba sensaksema liasü, ta Nagaland Cricket Association nung General Secretary Abu Metha sangdong ka ajanga metetdaktsü.

Pujara-i, “Ni nükjidong yur kanga bendanga agüja inyakba aser kü sasa azüoka aliba ajanga iba jenjang ya tongtet. Pei sasa azüoka bendanga agüja aser meranga inyakra tamakoktsü amai bilemba ajak koktettsü,” ta lanurtem ajungshi.

Cricket association den sensak asemba mapang pai, northeast tesem nungi cricket asayartem dak sempet lir aser parnok dak tematiba jenjang tongtettsü tashi lir, ta ashi.

Cricket ajanga ni North east tesem semdangtetba atema kanga pelar aser ni ajuruba ajanga lanurtemi iba asaya shishia agia mongin ka ka akümtsü kü teimla lir, ta pai ashi.

BCCI-i asaya nung terenlok atema iba ama sentong katsüba atema pelar aser ano tarutsü nunga north east tesem nung aliba cricket asayartem den tang dang nungi mapang talangba arua amongtsü kü tejangraba lir, ta Pujara-i ashi.

Iba coaching camp nung Meghalaya, Manipur, Arunachal Pradesh, Sikkim aser Nagaland state tem nungi parnok lanur 25 nem coach teneti National Cricket Academy, Dimapur nung tang training tagütsüdak lir. Iba camp atema lanur 58 aru ajisüaka BCCI national junior shimtetba inyakyim kübok anogo asemnü selection agiba sülen parnok 25 ya shimtet, ta sangdong ajanga metetdaktsü.