Northeast ya ‘organic capital’ sütettsü

Guwahati, November 27 (Agencies) : Alu nungi tsünütetba aser shishilembaba ajanga tajangzük anguba den mapa aser entrepreneurship tali adoktsü tebilemba nung Centre-i Northeast (NE) tesem ya India nung ‘organic capital’ akümtsü sentong lir, ta Hokolbarnü New Delhi nung Union minister of state (independent charge) for development of north eastern region (DoNER) Jitendra Singh-i ashi.
Iba tesem nung mapang talangka nungi mebenteti aruba tebilemtsütem aika küm ka shi nung inyakyim balala benoka inyaktepdar, ta Singh-i 5buba Consultative Committee for the Ministry of DoNER ketdang asüba mapang ashiba sorkar otongdar kati metetdaktsü.
“State tem tsüngda sendakteptsü atema tenzükba Northeast Road Sector Development-a item inyakyim rongnung ka lir ta pai ashi. Lenmangtem yanglutsü atema state shiai kiyonger state dak imlatepba ajanga gari lenmangtem kangasa majung kümogo,” ta otangdari shisem.
Northeast Industrial Policy asüngsashiba aser Northeast Tourism Development Council tenzükba ajanga tesem nung terenlok benertsür arur, ta Singh-i ashi.
“Sikkim nung tayimtsü anenba tesem sangküm nungibo amshitettsü imlar aser Umroi Airport, Shillong nunga runway talangba küma yanglushidar,” ta otongdari ashi.
Iba senden nung adener MP temji CL Ruala, Neiphiu Rio, Vincent H Pala aser Naba Kumar Sarania nunger liasü aser parnok den ano DoNER ministry aser North Eastern Council nungi ketdangser taintem dena liasü.
MP temi North East state tem lenmang ajanga sendaktepa akümtsü, au ajungkettsü aser North Eastern Council tajungba küma inyakyimtsü benoka jembi.
“NE nung Healthcare tsütsü temelenshi angur. DM (oncology) aser MCh (oncology) nung Cancer super-specialization menden ka Dr B Borooah Cancer Institute, Guwahati nung agütsütsü lemtetogo. DoNER ministry-i mapang tatsütsü achiba cancer mozütem tenlar aser linük nung aliba cancer institute tajungtem nung NE state 8 prongla nungi doctor tem nem cancer surgery agitsü atema training agütsür, ta otangdar jagi ashi.
Singh-i, Rajiv Gandhi Indian Institute of Management, Shillong nung Policy Research and Analysis atema taküm October 15 nü nungi Dr APJ Abdul Kalam Centre amenokbaji DoNER ministry-i India nung scientist tajungtiba rongnung ka, Kalam tushia lapokba lir. Kalam ya Shillong nung o jembitsü atema aruba mapang asü.