Northeast ya Southeast Asia asoshi kikümbang kümdaksütsü: Modi

New Delhi/Shillong, May 7 (Agencies): “Northeast ya Southeast Asia asoshi kikümbang kümdaktsütsü atema sorkari mapa inyaker aser iba tesem renloktsü atema sen aika endoka mapa inyakdar. Ajisüaka, merükmeju maliba ajanga iba alizüng ya metongtettsü akok,” ta Deobarnü Prime Minister Narendra Modi-i ashi.
“Iba ama tobur tajung kikümbang ya memerüki yura mesüra tashidak agi sünger mesüra azüngtsü-zülutsü memetetba jenjang nung lira, northeast-i linük renlokba indang kikümbang adena moutettsü. Asenok ket nung aliba rongsen ajanga asenok tangar memenepi mesüra sensaka melili” ta Modi-isa metetdaktsü.
Shillong nung Sevashram Sangha küm noklang ka ajungba benjungmung nung ‘video conferencing’ ajanga jemdidang Prime Minister-isa ashiba agi, “tawa linük ajungalen merükmejuba bushitepba nung Northeast nungi yimti 12 reprangba nung temerük yimti 50 rongnung Gangtok dang züngsema lir.”
Temerük yimtitem tarensen menden 100 nungi 200 tsüngda Northeast yimti 4 dang densem aser 200 o 300 tsüngda yimti tenet züngsema liasü. Iba tarensen nung Shillong menden 276 buba nung liasü, anungji northeast nung merükmejuba (Swachhata) ya nübor ajak asoshi tayongzükba tulu ka lir, ta Modi-isa shisem.
“Asenoki Northeast ya Southeast Asia atema kikümbang kümdaktsütsüla. Ajisüaka, kikümbangji memerüki lira, asen alizüng matongtsü, anungji nübortem aser Sangha ama teloktemi state sorkartem den yaritepa merükmeju mapa takok ngua inyaktsüla” ta paisa ayongzük.
“Nüjiso anguba sülen küm aika süia aruaka, Northeast ajungalen terenlok mali. Ozü sorkari takokba ajak agi north east state tem renlokdaktsütsü atema sentongtem atonga inyaker” ta paisa shisem.
Tongti süa inyaktsübatem rongnung connectivity aser tourism atema tesem ajungalen terenlok mapa inyaktsübatem lir. Item mapa ajanga Northeast ya Southeast Asia asoshi kikümbang kümdaktsütsü asoshi teyari angutsü, ta Modi-isa metetdaktsü.
“Northeast nung gari lenmangtem tajungba kümdaktsütsü atema sen crore 40,000 lemzüktsüogo, railway mapatong tulu 10 inyaktsü tenzükogo, electricity tajungba kümdaktsütsü asoshi mapa inyaker aser northeast-i tourist tem atsür arutsü meranger” ta Prime Minister-isa shisem.
Northeast nung kobi melii UDAN (Ude Desh ka Aam Nagarik) scheme sendakteptsü aser tayimtsü anendak tilatem yanglutsü. Shillong airport nung runway ka yangluloktsü sentong lir, ta paisa metetdaktsü.
Bharat Sevashram Sangha-i alima lendongtsüdongtem ajurudang shilem tajung agiba atema Modi-i tenüngsang agütsü.
“Tanelaren aser tenzükba külemi moutettsü ta Bharat Sevashram Sangha-i metetdaktsütsüla. Sangha tenzüksang, Swami Pranavananda-i ‘Bhakti’, ‘Shakti’ aser ‘Jan Shakti’ ajanga loktiliba nung terenlok mapa inyaktsü tenzük” ta paisa shisem.
“Sangha indang kongsang 100 den tema aser units 500 dak tali lapoka lir. 1923 nung Bengal ayawara, 1946 nung Noakhali mepetmesü, 1980 nung Bhogal gas lendong, 2004 nung Tsunami aser 2013 nung Uttarakhand lendongtem nung Sangha-i teyari mapa jenti inyakogo,” ta Modi-isa metetdaktsü.