Northeastern state asem nung state tenzükba anogo among

AGARTALA/SHILLONG, January 21(Agencies): Honibarnü Tripura, Manipur aser Meghalaya state tem nung 45buba state tenzükba anogo sentong balala renema among.
Prime Minister Narendra Modi-i Tripura, Manipur aser Meghalaya nung aliba neburtem den state tenzükba anogo tepela salem lemsatep.
Agartala, Tripura nung Governor Tathagata Roy-i sentong balala atonga aliba tem tenzüktsü.
Iba sentong nung, 1972 nungi Tripura-i ajangtetba takok tem koba kaket nung zülur adok, iba kaket Roy-i sayatsü.
Seminar aser sobaliba sentong balala January 23 tashi state ajunga nung agiyonga aotsü.
Tripura nung electricity magimai lir, anungji iba ya industry balala lapoka idakji amshitsüla aser iba ajanga maneni nisung aika mapa angutsü, ta Agartala Rabindra Satabarshiki Bhavan nung iba sentong nung o jembidang Roy-i ashi.
Maneni, northeast state tem nung raliwalirtem dak sendakba nung maparen aika asoshi maongka lir, anungji item mapatem nung ajemoka inyakba ajanga linük tajungba küma yanglushitsü aser mapa makai alirtem atema mapa aika agütsütettsü, ta paisa shisem.
Imphal nung state tenzükba anogo amongba sentong nung Chief Minister Okram Ibobi Singh aser Deputy Chief Minister Gaikhangam nati o jembi.
State tenzükba benjongmong, Meghalaya ajunga nung asaya sentongtem, aser ano tanga sentong balala aika renema among.
Ano tanü Meghalaya state yimtiba Shillong, U Soso Tham Auditorium nung amongba sentong nung Deputy Chief Minister R. C. Laloo tongti tesemdanger liasü.
Iba sentong nung sorkar mapa inyakertem nem Meghalaya Day Excellence Awards agütsü.
District mozüki ana aser lokti temang anepaluba tesem asem nem Kayakalp Award agütsü. Iba sentong nung ken dak alaka Centre of Excellence in Indian Classical and Western Music nungi jemji apuba, aser tanga sentongtem aika agi.
Chuba yimsüsüba kübok aliba state ana; Tripura aser Manipur, 1949 küm India nung aden, aser January 21, 1972 küm India nung state tejangja aküm. North Eastern Region (Re-Organisation) Act, 1971 tetuyuba nung Meghalaya, Assam kübok aliba nungi state tasen ka aküm.