Northern Angami-I A/C bye-election July 29 nü agitsü

Kohima, June 29 (TYO): Brihostibarnü Election Commission of India (ECI)-i Kohima district kübok 10-Northern Angami-I Assembly Constituency by-election July 29, 2017 nü agitsü, ta metetdaktsüogo.
May 24, 2017 nü MLA, Khriehu Leizietsu-i tebu aser tang teinyakdak Chief Minister, Dr. Shürhozelie Liezietsu nem maongka agüja iba menden azüngtetja liasü.
Nagaland sorkari tetsürtem nem menden shiteta yuja urban body election agitsü lemtetba ajanga nisung asem asüba, aika yiruba aser kiojen aika raksaba tatalokbatem sülen nüburtemi Chief Minister, T R Zeliang anema longkak aitba sülen February 22, 2017 nü NPF Tir, Dr. Liezietsu Chief Minister küma liasü. Ajisüaka Dr. Liezietsu ya NLA züngsem ka masü nungji inyakyim nung, pa CM tenangzükba agiba sülen ita trok nungbosa NLA züngsem ka akumtsü nüngdaka liasü.
Tanü Kohima nung aliba Election Office nung osangbenertem den jembidang Chief Election Officer (O), N Moa Aier-i bye-election agitsü anogo osangji metetdaktsü.
Bye-election atema sentongtemji yamai alitsü: July 5 nü osang metetdaktsütsü aser tenüng agütsütsü atema tatembangbuba anogoji July 12 asütsü, iba sülen July 13 nü tenüngtem reprangshitsü; candidate tenüng agientsü atema tatembangbuba anogoji July 15 asütsü.
July 29 nü anepdang 7:00 ako nungi tenzüka nikongdang 4:00 ako tashi polling station
25 prongla nung vote agütsütsü aser August 3 nü vote azüngtsü.
ECI-isa, model code of conduct ji tang nungi tenzüker aser iba kübok candidates, yimtenren party balala aser Centre o State sorkar ajak aiter, ta metetdaktsü.
ECI-i iba election nung polling station ajak nung Electronic Voting Machines amshitsü lemtetogo aser election mapang nung Electoral Voter Identity Cards (EPIC) nüngdaktsü, ta metetdaktsüogo.