Northfield school nung Global IDD Prevention Day amung

Kohima, October 21 (TYO) : Northfield School Kohima nung tanü Hokolbarnü Global Iodine Deficiency Disorder (IDD) Prevention day mungogo.
Director, Health & Family Welfare, Dr. John Sweyievisa-i, IDD ya alima rangben tebilemtsü ka lir aser October 21 anogo ya iba tebilemtsü metetdaktsütsü aser maneni iba tashidak nokdangba mapa inyaktsü shimtetba anogo lir. Iodine Deficiency ajanga temang shilem matamalem kümdakja Iodine Deficiency Disorder (IDD) tashidak adokdaktsür. Iodine deficiency ajanga tokong wakdaktsür, tekolok anü alema kümdaktsür aser temang aienba soter. Aji dang masü mashisa aliba tetsürtem tanur pa sasa azü nung otoker, tanur tasü asor mesüra tanur tekolok meshitaki asor, ta sentong nung o jembiba mapa rasaa ashi.
Pai nisung ka temang nung anogo shia iodine 150 micrograms nüngdaker aser ibaji aseni teti achiba chiyungtsü nungi nguteter, anungji kanga junga iodised asüba metsü tajung achitsüla. Kodang iodine deficiency agi tongdir ibaji meidoktettsü, ta pai shisem.
Nagaland ya Himalaya tesem nung densema lir aser iba tesem ya iodine agi anünga aliba tesem ta bushiteta lir. Anungji kaketshirtemi IDD tebilemtsü pei kibong, medemer aser kidangertem den lemsateptsüla.
Programme Officer, NIDDCP, Dr. Akuo Sorhie-i, iodine ya nisung ka temang asoshi kanga nüngdak aser asen temang shilem tongtibang kar mapa junga inyaktsü atema ibai teti nüngdaker. Alima nung netsüng yongsük asemsü lemdangba nung shilem kabo IDD agi kangshidar aser alima nung tekolok nung timtem agütsübaji IDD ajanga timba adokdaktsür. IDD nungi jenbutsü aser nokdangtsü atema Iodine tajung keta aliba metsü achitsüla, ta ashi.
Northfield School nung Principal, Jaison Jose-i, school nung iba ama sentong ayonga akaba ajanga kaketshirtemi IDD tebilemtsü tali jangja meteter aser department-i school nem iba ama maongka tulu agütsüba atema pelar, ta ashi.
Northfield nung kaketshirtemi IDD Prevention Day indang tenangzükba “IDD-My Concern” agi aser parnok dang metsü nung iodine alimali tendangba-a sayu.