Norway PM-i India semdangtsü

New Delhi, Aenjeti/January 03 2019 (Agencies): Taruba hopta Norway Ato kilonser, Erna Solberg-i anogo asemnü (January 7-9, 2019) India linük semdangtsü, aser iba mapang nung lai India Ato kilonser, Narendra Modi den senden mena onük aika nung o lemteptsü, ta tanü osang ka ajanga metetdaktsü.
Linük ana lenla aika nung tesendaktep tashi itshitsü nükjidong nung lenir anati onük aika nung o lemteptsü.
January 7 nü Solberg India tonga arutsü, iba sülen lai Raisina Dialogue aser India-Norway Business Summit na nung o jembitsü, ta Ministry of External Affairs (MEA)-i sangdong ka ajanga metetdaktsü.
Laisa Tir, Ram Nath Kovind aser linük tatong Tir, M Venkaiah Naidu na ajurutsü.
Ano External Affairs Minister, Sushma Swaraj-ia Solberg ajurua senden amentsü.
Ato kilonser Solberg-i linük semdangba ajanga linük ana tesendaktep jenjang reprangshitsü maongka angutsü, aser lenla aika nung tesendaktep tajungba akumtsü atema o lemteptsü, ta MEA sangdong nungsa shia lir.
“India aser Norway na lenla aika nung tesendaktep jenjang junga lir. Asen linük ana tsüngda rongsenkettsüng aser technical nung amalitepa inyakbaji kanga tongtibang. India nung Norway company 100 dak temai rong yangluba, petroleum dak sendakba services, hydropower, clean energy aser IT services nung sen indoka inyaker,” ta sangdong nung shia lir.
Ano Norway nunga India nunger company aika lir.
Solberg meina ketdangsertem aser business züngsemtem aika arutsü.
Yaküm April ita nung Stockholm (Sweden) nung India aser Nordic linüktem summit ka aliba mapang nung Ato kilonser Modi aser Solberg na jurila senden ka mena liasü.