NOTA

Sangküm küm tetenzüklen Nagaland assembly elections agitsü aliba dak rangloker arogotemi anir loktitentet aikati ‘Clean Election’ dak sendakba sentong aser maparen balala kanga meranga agiyonga arudar. Anogoshia ‘Clean Election’ indang osang prokshir aser osangkakettem nunga asenoki iba onük indang teti azünger. Atangji, asen state nung ochimashi agi sünger, asenok tangoa junga mesashitettsüsa tensa talenba nungi salatsü aser alar tia nungi nüjiba dangi arua, asen lima nung asenok kibur ama alitsü asoshi election merükteta agia sorkar tajung kümteter state len anidaktsütsü tangatetba nung Nagaland Baptist Churches Council (NBCC)-i ketdangsüa Nagaland ajungalen ‘Clean Election’ mapa inyaker. Iba mapa atema ABAM-ia Mokokchung district nung aliba Ao Arogotem zone wise lemsar Clean Election sentongtem agiogo aser ano Mokokchung adena orr aliba arogotem nunga iba sentong ayongzüka agiogo. Maneni loktitentet balalai ‘Clean Election’ dak sendakba pei pei sabang nung ayongzüka agidar. NBCC ketdangsüba kübok ABAM-i Aor arogotem ajak nung ‘Clean Election pledge card’ lema agütsüogo aser nisung aikati iba nung pei tenüng zülua tenangzükba agiogo. Ajisüaka, ano nisung karbo ‘pledge card’ nung sign asütsü atema arentaka bilema alitsü akok. ‘Ozü constituency nung tokteper candidate tem rongnung ka danga shimtsüsa nübo mali nungbo ni shiba nem vote agütsütsü?’ mesüra ‘Ni politics mejangrar, anungji Clean Election tenangzükba nung jiang sign mesüli’ mesüra ‘Election paiben agia aruyonga, ni mejangrarji, ni khen danga kü vote magütsüdang, taji Clean Election mapaji pusemer, saka tenangzükba jiang kecha magishili’ mesüra ‘Ni süpokrem-a magir, vote-a magütsür, taji Clean election tenangzükba nung sign masütsü’ ta tebilemba balala ajanga ‘Clean Election’ indang tenangzükba magibapurtema aika alitsüa akok. Ajisüaka, asenoki angatettsüba kaji, asenok Khristan tajung ka ama aser iba tangatetba nung pei arogo nung züngsem tajung ka ama arogo dak sendakba mapa ajak nung shilem tajung agir aser agitsü meranger. Iba denji saku, alima nung alir asünung, asenoki yimten yimsüsüba aser sorkar maparen nungjia, ochishia shilem tajung agitsüla. Nai nü indang vote magütsübaji kecha masü ta bilemya alitsü akok saka sorkar akümba inyakyim nung nai nü teinyaktsü tongti ka meinyakba lir. Nai nü indang vote ji magütsüyonga, shibai metet vote agütsüba anogo nung tangar kari nü indang vote ji agütsüdar asütsü akok aser ibaji kangasa tezütangtsüka lir. Nai politics mejangraba agi nai nü vote magütsüdangi aruya alitsü akok mesüra election nung candidate tem dak temulung masüba agi, nai nü vote agütsütsü atema polling station-i maoer asütsü akok. Ajisüaka, osang tajung ka lir aser ibaji India nung ‘negative voting’ ta ser inyakyim ka tenzükba lir. Iba ya election mejangrartem mesüra candidate/party mesaklokertem nem temeten agütsüba inyakyim tajung ka lir. Iba inyakyim dang ‘None of The Above’ (NOTA) ta ajar aser iba ya 2013 küm Supreme Court-i People’s Union for Civil Liberties versus Union of India tsüngda ken o angadangba sülen tetuyuba agütsüba nung ajemdaker tenzükba lir. 2013 küm NOTA ya Chhattisgarh, Mizoram, Rajasthan aser Madhya Pradesh aser Delhi elections nung mezüng amshi aser 2016 Assembly elections nungbo NOTA nung vote agütsütsü atema nisungtemi kanga ajungmesotepa liasü. Yaküm assembly election mapang Kerala nung tetsür telok kati nübortem dang candidate tem rongnung tetsür ka danga medenra, NOTA nung vote enokjang ta tayongzükba agütsü aser külen Tamil Nadu nunga lanur telok kati ochimashi anema nokdaker ta sayua NOTA nung vote enokjang ta tayongzükba agüja sentongtem ayongzüka agiogo. Anungji, asenok nem iba temeten agüja lir asünung, nai kecha marentaki ‘Clean Election pledge card’ nungji Tsüngrem tenüng nung sign süangma aser election agiba anogo nung, nai polling station-i orr NOTA nungji nü indang vote enokjangma. Na, politics mejangraba nisung ka asütsü akok mesüra nür constituency nung nai saklokba candidate mesüra yimten telok ka danga malitsü akok saka nai senso tajung ka ama aser alima yimten mapa nung ochishia shilem agitsü ta tangatetba nung, ‘temalen agüja alirtem shinga nema vote magütsür’ ta ochishia NOTA nungji nü senti vote enoktsüra, ibaji nai ‘Clean Election’ mapa nung shilem tajung agibaji asütsü.