Nov 1 nungi tenzüka Mkg nung gari kata mejajadaktsütsü

Mokokchung, Oct 19 (TYO): Mokokchung–Mariani lenmang majungba dak sentakba nung Mokokchung District Truck Owner Association-i department dang iba lenmang yanglutsü asoshi nenshipet nenshiaka, tanü tashi temelenshi kecha maliba ajanga tejashi sayua November 1, 2016 nungi tenzüka Mokokchung district nung gari kata mesenzüdaktsütsü asoshi “Chaka Bandh” ayongzüktsü telemtetba agiogo, ta tanü MDTOA ketdangsertemi osangbener senden ka nung metetdaktsü.
Sorkari iba anogo tsüngda telangzüba tajung ka magütsüra iba bandh-ji Nov 1 nungi tenzükbaji tanen makai aotsü, ta parnokisa metetdaktsü.
Mokokchung-Mariani lenmang majungba dak sentakba nung MDTOA-i August 18, 2016 nü Chief Engineer (P.W.D National Highway) dang gari senzütettsüsa lenmang yanglujang ta takhangba ka tezüluba ajanga agütsü, ibaji mataloktsüra parnoki mulungba mera agitsü ta shia anogo 30 (Aug 18- Sept 18) züngzüktsü, ta parnokisa ashi.
Iba dak sentakba nung, mapa tenzüka aotsü asoshi department-i MDTOA dang anogo 30 meshi nung, MDTOA-i anogo 30 (W.e.f Sept 18 – Oct 18) agütsü, saka department-i kuli küpdok ka dang inyak. “Temelenshiba kecha balaka mangu nung onoki iba ya ayongtsüsa akümer”, ta parnokisa mepelai ashi.
Mariani-Mokokchung lenmang ya district asem; Mokokchung, Tuensang aser Zunheboto asoshi taküm lenmang ka lir. Mapang shia yim aser telok balalai rongsen aser nübu jenti tenlaa iba lenmang ya yanglushir. Iba lenmang yanglushitsü asoshi department dang aiben nenshiaka, tanü tashi temelenshi kecha mali, ta parnokisa kuli kar dena ashi.
Iba lenmang majungba ajanga gari lendong mapang shia ataloker, gari aika raksaogo aser nüburtem lenmang aisü nung takoksa ajurur. “Iba lenmang nung ya takar-sensaker ajak senzür, ibai nübur meyong lenmang lir, onoki noktakba ya nübur asoshi lir”, ta MDTOA ketdangser kati ashi.
Bandh mapangji osangbener, medical, para-military, police aser magistrate on duty item dak alaka Mokokchung nung gari kata mesenzüdaktsütsü, ta MDTOA-isa metetdaktsü.
MDTOA-i ayongba “Chaka Bandh” sentongji Mokokchung nung aliba Pick-up, Taxi, Bus telungjemia pusema nungitba item telungjem balala nungi ketdangsertemi metetdaktsüogo.