Nov. 11 nungi ATM nung Rs 500, Rs 2,000 note tasenba angutsü

New Delhi, November 09 (Agencies): Hokolbar nungi ATMs lapokdang sen 100 jenti angutsü ta jembiba mapang ka nung tanü Finance Secretary, Ashok Lavasa-i, sen 500 aser 2,000 tasenbajia agizüktettsü, ta osang jangjatsüogo.
Mongolbar aonung Ato kilonser, Narendra Modi-i tang tamshidak sen 500 aser 1,000 note anentsüba osang sangdongba sülen nisungtemi sen 100 note angutsü kanga asaker, aser iba dak sentakba nung Lavasa-i, “Iba nungji tetsükdaktsü malitsü kechiyong ibaji (Rs 500, Rs 2,000 tasenba) November 11 nungi ATM ajak nung angutsü,” ta metetdaktsü.
Sorkari, ATMs anogo ananü shibangtsü aser Hokolbarnü nungi Nov. 18 tashi card ka nung anogoshia sen 2000 agizüktettsü, ta metetdakja lir.
November 18 sülen nungibo nisung kati anogoshia sen 4,000 agizüktettsü.
Tan Honibar aser Deobar Bank lapoktsü
Linük tesem ajaklen tan Honibar aser Deobarnü nüburtem atema sorkar bank tem lapoktsütsü, ta Reserve Bank of India (RBI)-i metetdaktsüogo.
Brihostibarnü nungi nüburtemi sen jenti bener meleni arutsü imlar, aser iba atema bank tem renema lir. Brihostibarnü nungi bank kongsangtem nung nisungtem nungteptsü ta bilema Punjab aser Haryana-ibo bank nung timtem majurutsü atema sorkar dang police meshiogo. Bank temia, customer tem junga tenzüktettsü atema branch shia nung counter talila lapoktsü, ta metetdaktsüogo.
Anogo ishikabo ATMs nung sen azüngtettsü südi ta bilema SBI ketdangser kati, bank temi ATM nung sen enokba mapa akhi dang nungi talila inyaktsü telemtetba agiogo, ta metetdaktsü.
Sen lakh 2.5 dak tema indang kuli melira senchi alitsü
Sorkarisa, anogo 50 (Nov. 10-Dec 30) tsüngda sen lakh 2.5 dak tema deposit asüba senji sen tarulen kuli melira saru senchi shilem 200 alitsü, ta metetdaktsü.
“November 10 nungi December 30, 2016 mapang nung account shia nung sen lakh 2.5 dak tema deposit asüba osangtem onoki angutsü. Tax Department-i ibaji sen deposit asürtem indang income returns den medemdangtsü, aser tim teinyaktsü inyaktsü,” ta Bodhbar aonung Revenue Secretary, Hashmukh Adhia-i metetdaktsü.
“Account holder-i sangdongba income nung meputep lira, ibajibo saru magütsüba ama züngshitsü, aser Income Tax Act Section 270 (A) nung aliba ama saru sen den senchi shilem 200 densema agitsü,” ta paisa ashi.
Ajisüaka tilateri shishilembar, tilateri mapa inyaker kinüngtsürtem, kisüjensür aser mapa inyakertem, shirnok ket nung sen rizünga lir, parnokibo iba atema shisabulutsü menüngdak, ta paisa shisem.
“Item ama nisungtem shirnoki bulutsü menüngdak, kechiyong sen lakh 1.50 nungi sen lakh 2 deposit asütsüpurtemji tax income küboki maiter. Sen mechimenu deposit asüba atema Income Tax Department nungi timtem majurutsü,” ta Revenue Secretary-isa metetdaktsüogo.