Nov. 18 ayaterm tashi National Highways nung toll fee magitsü

New Delhi, November 14 (Agencies) : November 18, 2016 ayaterm tashi National Highways nung toll tax mesarutsü ta tanü sorkari anogo pezü apuloktsüba sülen metetdaktsü.
“Sorkari November 18 ayaterm tashi anogo apuloktsütsü telemtetba agiogo” ta Road Transport & Highways Minister, Nitin Gadkari-i Twitter nung metetdaktsü.
National Highways nung traffic tiptema senzütsü aser bank o ATM nung nisungtem sen melentsü & agizüktsü atema tarensena nokdaktepa nung teyari agütsütsü atema sorkari iba telemtetba agi.
Iba osang ya BOT, OMT operators aser tanga fee collection agencies ajak nem metetdaktsüogo.
Prime Minister, Narendra Modi-i ozüng alema sen amshiba aser ochimashi nokdangtsü atema November 8 aonung senpak 500 aser 1,000 agiener ta osang metetdaktsüba sülen, November 9 nü sorkari Novmeber 11 tashi National Highways nung toll fee magitsü ta metetdaktsü aser ibaji parnokisa November 14 ayaterm tashi mapang apuloktsü.
Mezüngbo sorkari November 11 ayaterm tashi toll plazas nung senpak 500 aser 1000 tejentem agizüktsü ta telemtetba agi saka sen temelenzük peria manguba timtem ajanga traffic jam khuret tulu ajuru.
“Onoki tensa reprangshim aser fee saruba anentsü lemtet” ta Road Transport & Highways Minister, Nitin Gadkari-isa metetdaktsü.
Toll fee mesaruba ajanga takoksa angubaji koma asütsü ta osangbenertemi asüngdangdang, Gadkari-i “sorkari iba khuretji abentsü” ta langzü.