Nov 21 nü tashi Rohingya Refugees tem meyoki atatsüla: SC

New Delhi, October 13 (Agencies): India nung aliba Rohingya Muslims nunger meyipa yoktsü onük nung party balala nem mapang maneni agüja Hokolbarnü Supreme Court (SC)-i maneni iba ken o November 21 nü angadangtsü lemtet, iba den külemi iba anogo tashi nung Rohingya refugees tem meyipa meyoktsüla, ta oshidang agütsü.
SC-i, Rohingya Muslims onük ya tulu lir aser linüki shilem tulu agitsüsa lir, ta ashi.
Supreme Court Judge asemi akümba bench nung lenir, Chief Justice Dipak Misra-i, “Linük atema kanga tongtibang onükji sendoka meyutsütsüla, iba den külemi Rohingyas Muslim nunger indang meimchir temeten-a mamatoktsüla. Asenoki anaprong nung liromedema inyaktsüla. Iba ya mechimenu ken o ka masü, iba onük nung meimchir temeten densema lir,” ta ashi.
Additional Solicitor General, Tushar Mehta-i Supreme Court dang, “Iba ken o nung International telatetba dena lir,” ta ashi.
Tamalen SC-i Centre aser Rohingya Muslims nunger ana dang iba ken o nung mangatettep madoktsü aser kati ka maitsüteptsü metetdakja lir.
Rohingya nunger Myanmar-i meyipa yoktsü atema Centre-i telemtetba agiba anema Rohingya Muslim nunger ana- Mohammad Salimullah aser Mohammad Shaqir nati sorkar tetuyuba anema Supreme Court nung temepishiba ken o ka agüja liasü. Tenati ashiba agi, Myanmar nung parnoki reshikangshi tai ajuruba ajanga India nung jenok.
Brihostibarnü nüngtugu nisung kari Ato kilonser, Narendra Modi dang Rohingya refugees meyipa meyoktsüla, kechiyong parnok ya linük security atema amokmeren lir ta asübaji tajemdakdak maliba o, ta metetdakja liasü.
Yimjak nung metetdaktsüba shidi zülur nisung 51 rongnung Congress MP Shashi Tharoor, taoba mapang home minister, P Chidambaram aser taoba Union home secretary, G K Pillai nunger densema lir.
“India-i Rohingyas nunger Myanmar-i meyipa yoktsü atema temeten bushia parnok ajakji linük security atema amokmeren lir ta jembibaji tamendakdak maka,” ta shidi nungji shia lir.