Nov. 28 nü NPCC-i longkak aittsü

Kohima, November 24 (TYO): Sorkari sen tamshidak anentsütsüba anema November 28, 2016 nü linük tesem ajaklen opposition party temi takhangba onük kar agüja longkak aittsü, parnok den külemi NPCC-ia longkak aittsü lemtetogo, ta tanü NPCC Tir, K Therie-i sangdong ka ajanga metetdaktsü.

Iba anogo nung opposition party temi sorkar dang, sen tasen peria memenüng tashi sen 500 aser 1000 notes tejenba amshitsü melatsü aser yimtsüng nung alirtem atema yimtsüngtem nung Banking services lapoktsütsü asoshi takhangba agütsütsü.

“Iba anogo anüngdang 11:00 ako nung City Tower, Dimapur nung longkak aitba lokti senden akatsü, anungji iba senden nung senso ajak adentsü mepishir,” ta kasa sangdong nung shia lir.

“Onokisa opposition party tem, sensotem, Chamber of Commerce & Industries aser  Trade Unions ajak dang item takangba pusemba temaitsü sayua November 28 nü anüngdang 11:00 ako nungi 12:00 ako tashi dokantem shibangtsü aser Deputy Commissioners nem tezüluba nung item takangba agütsü aoba flag march (pei-pei wako bener arutsü) nung shilem agitsü jaoker,” ta NPCC-i kasa sangdong ajanga metetdaktsü.