Nov. 30 nungi Jharkhand nung shilem 5 lemsar election agitsü

New Delhi, November 01 (Agencies): Hokolbarnü Election Commission of India-i, Jharkhand nung shilem pongu küma lemsar Assembly elections agitsü, ta sangdongogo.
Mezüngbuba shilem nung November 30 nü assembly constituencies 13 nung election agitsü aser December 23 nü vote azüngtsü, ta CEC, Sunil Arora-i metetdaktsü.
Tanabuba shilem December 7 nü, tasembuba shilem December 12 nü, pezübuba shilem December 16 nü aser tatembangbuba shilemji December 20 nü agitsü.
Jharkhand Legislative Assembly kümsük ya December 27 nü tembangtsü.
State assembly election atema Model Code of Conduct November 1 nungi tenzüker.
Tan election nung polling booths shilem 20 agi timba kümogo, ta Sunil Arora-i metetdaktsü.
Haryana aser Maharashtra assembly elections nung ruling Bharatiya Janata Party (BJP)-i imlaba ama takok junga manguba sülen tang Jharkhand nunga election agitsü.
Haryana nung Manohar Lal Khattar-i aniba BJP-i majority mark metongtet, ibayongji Jannayak Janata Party (JJP) teyari agia sorkar aküm. Ano külen Maharashtra nung BJP-i parnok kijai sorkar akümtsüsa menden peria mengutetba ajanga tang tashi sorkar mekümteti lir. Maharashtra nung BJP den teloktep party Shiv Sena-i BJP dang küm ponguji lemsar party anaprong nungi Chief Minister inyaktsü akhanger, ajisüaka BJP-i Shiv Sena nem Deputy Chief Minister menden ang agütsüner.
Jharkhand nung Chief Minister Raghubar Das-i aniba BJP-i maneni election nung takok tulu ngua sorkar akümtsü imladar.
2014 küm Jharkhand assembly election nung BJP-i menden 37 angu aser BJP den teloktep party All Jharkhand Students Union (AJSU)-i menden pongu ngua liasü.
Assembly menden 81 aliba state nung NDA-i majority mark- 41 dak tema ngua sorkar küma liasü.