Nov 5 nü Fadnavis-i CM tenangzükba agitsü

New Delhi, Yimpoksüi/November 01 (Agencies): November 5, 2019 nü Devendra Fadnavis-i Maharashtra Chief Minister menden atema tenangzükba agitsü, ta osang ka ajanga metetdaktsü.
Chief Minister Devendra Fadnavis den külemi atongsema inyaker kati ashiba agi, BJP-i tanga party den meloktepi sorkar akümtsü aser November 5 mesüra 6 nü Mumbai nung aliba Wankhede Stadium nung sorkar tenangzükba agitsü.
Osang angazükba agi, BJP den teloktep Shiv Sena medenaka BJP-i parnok sasa sorkar akümtsü, aser tenangzükba sentong achaayangtsü atema BJP MLAs- Prasad Lad aser Chandrakant Patil na nem mapa nungloktsüogo.
Tanep osangbener den jembidang Shiv Sena lenir, Sanjay Raut-i, “Party-i 50-50 inyakyim nungi masetshir. 50-50 inyakyim tetezü kechi? Iba nungji CM menden madener asü? CM mendenji kasasa lemsatsüla,” ta ashi.
“Shiv Sena-i dang melungtetra party-i menden peria angutsü aser sorkar akümtsü. 50-50 inyakyim nung ajemdaker nüburtemi vote agütsü. Nüburtemi Chief Minister ji Shiv Sena nungi aginer,” ta Raut-i ashi.
Tawa agiba Maharashtra assembly election nung single largest party ji BJP (menden 105) liasü aser Shiv Sena-i menden 56 angu. Opposition teloktep nungi Congress-i menden 44 aser NCP-i menden 54 ngua liasü.
Osang angazükba agi, state nung sorkar akümtsü atema Congress-NCP teloktepi Shiv Sena yaritsü melunga lir.