Nov. 8 – Dec. 30 tashi CCTV nung tangokba ajak meintoki ayutsüla:RBI

Mumbai, December 13 (Agencies) : Mongulbarnü Reserve Bank of India (RBI)-i, bank tem nung ozüng alema inyakertem aputsü atema November 8, 2016 nungi December 30, 2016 tashi CCTV tem nung bank mapang map inyak dang tangoka aliba aser sen süngdentem meintoki rizünga yua alitsüla, ta bank ajak dang sangdongogo.
“Tetuyuba tasen magütsü tashi November 8, 2016 nungi December 30, 2016 tashi bank ajaki pei pei bank indang CCTV tem nung tangoka aliba ajak den sen süngden kata meintoki ayutsü metetdaktsür,” ta Mumbai nung RBI-i sangdong ka ajanga metetdaktsü.
Iba inyakyim ya ajanga bangdak puri ozüng dak aliba ama sadema inyaktettsüsa tim masüba tsütsü nungi sen note tasen melena agiba kanga jangja metettsü, ta RBI-i ashi.
Reserve Bank of India-i sen 500 aser 1000 senpatem menokdang tsüngda, October 27, 2016 nü, bank ajak nung hall aser counter ajak CCTV agi ayimjema yur ozüng alema sen taila amshiba nisungtem jangjatsü asoshi inyaktsü metetdakja liasü.
Sorkar-i tang nokdanger aliba sen 500 aser 1000 senpaktem December 30, 2016 tashi nung bank tem nung inoktsü mapang agüja lir.