Nov ita tashi nung Secretariat & Kisama lenmangtem yangluzüktsü

Kohima, September 19 (TYO): Civil Secretariat tesem den sendaktepba lenmang aser Kisama Heritage village nungi National Highway-2 tashi lenmang tasenba taküm November ita nung tembangtsü, ta Roads & Bridges Minister, Y Vikheho Swu-i ashi.
Honibarnü Vikheho Swu-i YRS, MTF & State Lotteries Parliamentary Secretary, Khriehu Liezietsu den külemi tang teinyakdak mapa anaprong sema senzüba sülen iba osang metetdaktsü.
Kisama nungi lenmang tasenba earth cutting atema sen crore 2 aser Working Women’s Hostel Secretariat road anasa Sanuorü nung bye-pass lenmang atema crore 1 lemzükja lir.
Kisama nung yangluba lenmang jagi Phesama yimtsüng adener NH-2 den sendakteptsü aser iba lenmang tasazükji kilometer 2.5 nungi 3 shi tsüngda lir. Iba lenmang yagi traffic timtem kanga ajema kümdaktsütsü, ta tanü Swu-i ashi.
Iba mapa ya Phesama nungi telok kati inyaker aser parnoki road cutting aser soiling mapa inyaktsü aser ali tashi itta akümba sülen black-topping tenzüktsü. Road cutting aser soiling atema sen crore 2 agütsüogo aser black topping atema ano sen crore 2 lemzüktsütsü akok, ta paisa shisem.
Kisama nung yangluba lenmang tasenbaji October tom ka tashi nung tembangtsü imlar, ta Swu-isa metetdaktsü.
Ano külen, Sanuorü nung yangluba bye-pass lenmangji November ita tom tashi ka nung tembangtsü aser apu ka meyanglu tashi iba lenmang ya amshia atatsü. Iba lenmang atema Urban Development Department ajanga sen crore 1 lemzüktsüogo aser ano crore 1 lemzüktsütsü akok, ta Roads & Bridges Minister-isa ashi.
Tanü Swu-isa Secretariat tesem nung Kohima yimtsüng nungi Lhisemia Khel-i yangluba gari lenmang atudang semdang aser iba mapatong nung takok lenmang ajak agi yariteptsü ta pai nangzük.