Novak Djokovic ATP asaya 700 akoker asayar akümer

Dubai, February 25 (Agencies): Serbia nunger tennis asayar mongin, Novak Djokovic-i Tunisa nunger Malek Jaziri madak takok ngua tang tasayadak Dubai Tennis Champiosnhips quarterfinal asayatsü jenjang yashi, Bodbar nü ajangzükogo.
Tebur World No. 1, Djokovic-i yashi minute 65 nung points 6-1, 6-2 ngua Jaziri ayong ayonga tsükdakja quarterfinal asayatsü jenjangji angu.
Djokovic-i Spain nunger Feliciano Lopez den quarterfinal nung ajuruteptsü.
Arishi küm 28 tain Djokovic-i tan asaya akokba sülen pai tennis asayatsü tenzüker tanü tashi nung ATP asaya 700 buba akoker asayar küma, alima ajunga nung tennis asaya timba akoker asayar tarensen nung 12 buba jenjang tongogo.
Iba tarensen nung America nunger Jimmy Connors-i asaya 1,254 koka, temaba jenjang ngua lir.
Asaya 1,067 akoksang, Switzerland nunger Roger Federer aser asaya 775 akoker, Spain nunger Rafael Nadal na sülen anidaka, Djokovic ya tang tennis tasayadak asayar rong nung asaya 700 ser tema akoker asayar 3 buba akümer lir.
“Ni küm 10 tejaklen nungi tenzüka asaya aika nung shilem agiogo aser ni asaya balala nung takok anguba atema kanga pelar. Tarutsü mapang nunga takok tulu ngua asayatettsü imlar,” ta #nole700 hashtag züluokba cake ka asayamong tayonger ket nungi agizükdang Djokovic-i metetdaktsü.
Ano külen, tan asayamong nung 2 buba jenjang abener, Stanislas Wawrinka-i Germany nunger Philipp Kohlschreiber madak takok ngua semifinal asayatsü jenjang tanü, Brehostibar nü ajangzükogo.
Switzerland nunger Wawrinka-i tanü points 7-5, 6-1 agi Kohlschreiber tsükdaktsüba sülen Australia nunger Nick Kyrgios den semifinal asayatsü jenjang angu.
Tan asayamong nung tasembuba jenjang abensang, Kyrgios-ia points 6-4, 6-4 ngua Czech Republic nunger Tomas Berdych quarterfinal asaya nung tsükja semifinal asayatsü jenjang ajangzük.