Novak Djokovic-i Queen’s Club Wildcard agizükogo

Aami (June) 12, 2018 (Agencies): Novak Djokovic-i taruba hopta Queen’s Club nung Fever-Tree Championships nung asayatsü atema wildcard agizükogo, ta Tentonü asayamung ayongertemi metetdaktsü.
Taoba world number 1 ya taküm küm tetenzüklen tekatsüla surgery agiba sülen akhi ama junga asayatsü asoshi meranga inyakba mapang ka lir. Tawa tembangba French Open nung pa quarter-finals tongteta asayaogo. Iba asaya nung pa Italy nunger asayar Marco Cecchinato-i tsükdaktsü.
Asaya nung tekong nung tashiba aliba anepaluba sülen Grand Slam 12 ben tashi koker alisang ya Wimbledon nung shilem agitsü asoshi mejangjai aküm.
“Rome aser Paris nung jangratema asayar ni tang tanga tajangshiba ka atema renema lir,” ta Djokovic-i tournament website nung zülutsü.
“Ai nung asayatsü ya kanga balaka lir anungji ni iba asayamung nung shilem agitsü asoshi maongka anguba atema kanga pelar, koba Wimbledon asoshi terenemshiba tajung ka asütsü.”
“Ni küm 10 tejakdang Queen’s Club final tongteta asayaba tang tashi pelaa bilemteter aser iba mapang nung tarep asaya koka liasü,” ta paisa ashi.
World number one Rafael Nadal aserBritain nunger asayar Andy Murray nata iba asayamung nung shilem agitsü lir saka tenaprongla asayatettsü asü masayatettsüar mejangja.
Amungnü Roland Garros akokba sülen Nadal-i pa grasscourt nung asayatsüba sentong ano mejangja ta ashi, kechiyong pa claycourt nung asayamung ishika asayaa arur tang pa temang asadangshitsü nüngdaker.
Murray-i Queen’s Cup ponguben tashi koka lir aser pa taoba küm Chiteni (July) yiruba sülen tang tashi masayai arudar. Pa taruba hopta London asayamung nung shilem agitsü imlar.
Maneni Marin Cilic aser Stan Wawrinka nungera iba asayamung nung shilem agitsü.
Iba asayamung ya Chiteni (July) 2 Wimbledon metenzük tsüngda hopta ana lia taruba Tentonü nungi tenzüktsü.