Novel Coronavirus nungi kümzüktsü atema India renemshir

New Delhi, Tsüklai/Feb. 06 (Agencies): Alima tesem balala nung Novel Coronavirus (2019-nCoV) tashidak kanga kera prokshiba mapang India nunga iba tashidak yagi tesem ajunga asüngtsü akok, ta temulung melemteti lir. India nung iba tashidak nungi kümzüka alitsü asoshi gloves aser mask aika lir, ta ashir.
Association of Indian Medical Device Industry (AiMeD), koba India nung medical osettem yangluba lokti tentet ka lir, parnoki data bendenba nungi metetdaktsüba agi, masks aser coveralls yangluba company 22 nungi 20 nung tabu asem aliba (three layer) mask küm ka nung tejang million 222.5 yanglutettsüsa lir, tabu ana aliba (two layer) masks küm ka nung tejang million 15.6 aser coveralls tejang million 3.7 yanglutettsüsa lir.
Linük telungzük nung item company temi küm ka nung layer asem aliba coveralls tejang million 55, layer ana aliba coveralls tejang million 7.2 yanglutettsü akoker.
Glove yangluba company 30 nungi company 11 senteper tejang billion 1.7 yangluteter aser tejang million 300 tali yanglutettsü. Glove tang yanglua aliba tejang billion 1.7 nungi shilem 44 mesüra tejang million 753 bo bendanglen nungi bener aruba. Tang India nunger shishilempadak glove ya billion pezü shi lir ta ashir, aser item nungi tesadang ka surgical gloves aser shilem 45 examination gloves lir, ta asadangteta lir.
Malaysia, Thailand aser China linüktem nungi India-i examination gloves billion 1.8 shi bener arur, ta Hindustan Syringes & Medical Devices and Forum Coordinator of AiMeD indang joint managing director Rajiv Nath-i ashi.
Ministry of Health ajanga company balala dang item oset yangluba indang asüngdangaka tang tashi item oset tali yanglutsü atema totuyuba agüja mali, ta osang ajanga ashir.
Delhi nung aliba sorkari Honibarnü National Centre for Disease Control Call Centre (+91-11-23978046) amenoka nüburtem nungi tasüngdangba aser mejangjai aliba osangtem agütsür.
Drug Controller General of India (DCGI) ajanga HIV azüokba nung kanga bulua amshiba mozü kar coronavirus agi kongshir alir dak kanga kümdanga amshitsü temelaba agütsü.
Kerala nung iba tashidak nisung asem dak puteta temang anepaludar aser iba tashidak keta lir südi, ta temulung melemteti aliba nisung asem Uttar Pradesh kübok Balrampur, Agra aser Gonda district tem nung mozü kidang anir oa lir.
Novel Coronavirus (2019-nCoV) ya Wuhan, China nung züng alema arem shiruru ayokdak tesem ka nung poktet südi, ta temulung melemi lir aser tangbo iba tashidak ya alima 28 tongogo. Iba tashidak ya nisung 28,276 dak tejangja puteta lir aser nisung 565 süogo.