Novel zülur Kashi Nath Singh-i Bharat Bharti Award angu

Lucknow,  September 15 (Agencies):Tangar aika dang nungi kaket zülur tajungtisang, Kashi Nath Singh nem Hombar nü ‘Bharat Bharti award’ agütsüogo. Iba ya Uttar Pradesh sorkari literary senpet agütsüba rongnung tematiba senpet lir.

Arishi küm 78 tain, kaket zülur, Kashi Nath Singh nem iba senpet nung zülu jang kar ajenloker state Chief Minister Akhilesh Yadav-i agütsü aser iba den külemi sen-a lakh 5 agüja liasü.

2011 küma Singh-i züluba novel ‘Rehan par Ragghu’ atema pa nem Sahitya Akademi award agütsüogo. Ajak liaka pai züluba novel ‘Kashi Ka Assi’ ya ajaki meteta lir aser iba kaket nung aliba otsü nung ajemdaker Bollywood film  ‘Mohalla Assi’-a yanglua lir.

Iba novel nung 1970s mapang Varanasi ghats nung kaketshir aser yimten yimsüsertem dak aliba yimya yimpong rasaa lir. Iba den külemi India yimtiba nung tamangba aser sobaliba dak sentakba otsü kanga jangja shia lir.

Pa den külemi kaket zülur telemsa balala nung senpet angurtemji Mridula Garg, Krishna Bihari Mishra aser Vinod Kumar Shukla nunger liasü.