November 3 nü SC nung tetsürtemi benokba ken o angatsü : Dr. Maongwati

Chatteswari colony nung DMC project lapokba sentong nung Secretary, Municipal Affairs Dr. Maongwati Aier (IAS), aser Chief Executive Officer DMC H Atokhe Aye na noksa nung angur.

Dimapur, October 17 (TYO) : Joint Action Committee on Women Reservation (JACWR)-i civic bodies poll aser talisa Dimapur Municipal Council (DMC) nung tetsür nem shilem 33 lemzüka yutsütsü atema Supreme Court nung Special Leave Petition benoka alibaji November 3, 2015 nü angatsü, ta Secretary, Municipal Affairs, Dr. Maongwati Aier (IAS)-i Honibarnü metetdaktsü.
Dimapur Municipal Council (DMC)-i Chatteswari colony nung RCC box culvert ana den drain with cover slab aser Supply Colony, Dimapur nung drain with cover slab lapoktsüdang Dr. Maongwati Aier (IAS)-i iba osang metetdaktsü.
Iba onük nung ajemdaker 2010 küm Nagaland nung DMC, Kohima Municipal Council aser Mokokchung Municipal Council dena urban local bodies 19 indang election magitet. Ano, state sorkari election magitetba ajanga taküm 14th Finance Commission-ia municipal bodies nem senotsü agütsüba anenogo, ta paisa ashi.
Supreme Court-i obendang agütsüba sülen election maparen tenzüktsü aser iba sülen ang municipal teloktem central fund angutsü, ta Maongwati-isa metetdaktsü.
DMC CEO, H. Atokhe Aye lenisüba nung Dimapur nung terenlok mapa jenti inyakba atema Maongwati-i pa nem tenüngsang agütsü aser Northeast nung Dimapur ta smart city ka kümdaktsütsü atema nübortemi DMC den yaritepang ta paisa ayongzük.
Iba sentong nung CEO DMC H. Atokhe Aye-ia ita ka tsüngda DMC-i terenlok mapa inyakba osang metetdaktsü.
Swachh Bharat mission den putepa DMC-i Dimapur tesem balala nung merükmejuba dak sendakba tezüluba 45 tashi yutsüogo, ta Atokhe-isa ashi.