NPA-i governor dang pai jembiba o jangjashitsü akanger

Dimapur, November 24 (TYO) : Assam Rifles-i tawa Nagaland nung yimozülurtem dang NSCN-K teloki agütsüba osang kecha madoktsütsüla ta ozüng agütsübaji tim dang liasü ta shia Nagaland angh P.B.Acharyai nungitba osang angashia temulung animesüngzüktetter aser jashir ta tanü sangdong ka ajanga Nagaland Press Association (NPA) ajanga metetdaktsüogo.
Taoba Deobar nü Nagaland aser Assam angh, P.B.Acharyai Nagaland nung yimozülurtem dang Assam Rifles-i kiranglongrar telok ta züngshitsüsa sangdonger aliba NSCN-K teloki agütsüba osangtsüsang madoktsü asoshi ozüng agütsübaji tim dang liasü ta metetdaktsüba osang angashia Nagaland nung osangbenertem telongjemi tanü iba osang ya metetdaktsü.
State nung governor kati pa den alir sepaitem nem yimten tashi amshia yimozülurtem nem ozüng agütsütsü asoshi tashi agütsübaji onokibo mangatetter ta NPA telokisa metetdaktsü.
Alima ajunga nung, India aser Nagaland nung dena anogo shia alima nung kiralongrartem ISIS mesüra Al Qaeda nungertemi sangdongba osang adokbajia state nung yimten aser sepaitemi ozüng raksaba mapa ka ama bilemer asü ta onoki süngmanga bilemer ta NPA-isa metetdaktsü.
Ozüngi memelaba telok kati alima nung lendong timtem agütsütsüsa angazükba aser reprangtetba osang adoktsübaji ozüngi memelaba telok yariba den kasa asütsü ta bilemra, iba jagi state nung intelligence mapa inyakertem dak temulung alemtsü malia ta sayur aser ibaji ajanga state nung nübortem lendongbang nung yutsür asütsü ta NPA-isa metetdaktsü.
Nagaland ama yimten nung mepetmesü aliba lima ka nung inyaker osangbenertem asünungji, teti onoki shinga tsübua mesüra yaria masü saka kechi shitak aji timi zülutsübaji onok khuret lir, iba jagi dang asenok lokti tajangzük angutsüsa shisalemsatepba lenmang sademsadema lapoka toktsür ta NPA-isa metetdaktsü.
Kecha mebilemdangi Nagaland anghi osangbenertem anema Assam Rifle teloki inyakba mapa nungitba agi onok temulung animesüngzüktetter, anungji iba ama jembiba oji anghi nübortem dang jangjashitsütsüla aser Assam Rifles purtemi yimozülurtem nem ozüng agüja alibaji memenui meyipa agitsüla ta NPA telokisa takangba ka agütsüogo.
Nagaland angh, P.B.Acharyai Nagaland nung yimozülurtem anema Assam Rifles-i inyakba nungitbaji Naga Hohoi aitsüogo. Naga Hohoisa Assam Rifles purtemi state nung yimtena mali ama yimten tashi amshiba ya state sorkari reprangtsüla ta metetdaktsü.