NPA-i govt dang osangbenertem reprangtsü akanger

Dimapur, March 12 (TYO) : Nagaland nung osangbenertem lendong timtem mapang yaritsü asoshi state government-i yaküm Nagaland Journalist Welfare Scheme (NJWS) ka tenzüktsüogo saka senotsü melemzüktsüba ajanga tang tashi mapa küma mouteti lir, anungji iba scheme ya April 2017 nungibosa mapa küma aotsü atema tang küm tasenba 2017-18 budget nung senotsü shitak lemzüktsütsüla ta Nagaland Press Association (NPA) teloki metetdaktsüogo.
Iba takangba ya yashi Honibar nü Hotel Saramati, Dimapur nung NPA lokti senden ka amenba mapang renemer metetdaktsü.
Ano, NPA-isa government dang yaküm jembir anendaka ayuba Nagaland Accreditation policy reprangshia tekaratiba nung Nagaland nung osangbenertem tajungba aser tesademba inyaka otettsü atema latetdaktsüner ta metetdaktsü. Nagaland nung osangbenertem shirnok tejangja osangtsüsang adokdak küm asem dak tema inyaker parnok ajak nem Accreditation maongka ya agütsütsüla ta NPA-i takangba ka agüja lir.
Kasa senden nungsa, tanü asüng kija aser telok kari osangtsüsang adokdak tashiyim agi osangtsüsang aser ocet adokdaktsütsü asoshi amokmerener, iba jagi aiben osangzülurtem timtem ajurur, anungji item tashiyim mapatem anema akangakanga nokdaktsü lemtet.
Nagaland nung osangbenertem ajak longjemer tashi itta aotsü asoshi NPA ketdangpurtemi anir osangbenertem aser osangtsüsang adokdak inyaker ajak den shisalemsatepa aotsü telemtetba ka agiogo.
Ano, osangbenertem mapa tajungba küma renlokdaktsütsü nükjidong nung küm tsüngda NPA ajanga refresher workshop (orientation program) ka agitsü lemtet ta sangdong ka nung NPA tongti zülur Wb.Along Longkumeri metetdaktsü.