NPA-i Journalists’ Welfare Scheme pelaa agizüker

Dimapur, Nov. 22 (TYO) : Tawa Nagaland government-i Nagaland nung osangbenertem koda masüba timtem lendong aser shilumanem tulu ajuruba mapang senotsü teyari agütsütsü asoshi Nagaland Journalists’ Welfare Scheme (NJWS) tentetba asoshi Information & Public Relation department dang pelar aser iba mapaji pelaa agizüker ta tanü sangdong ka nung Nagaland Press Association (NPA)-i metetdaktsüogo.
Nagaland Journalist Welfare Fund sentong ajanga Nagaland nung osangbenertem rongnung asüama atalokdang, mesüra teti asoshi lemtatsüsa lendong ajurudang, mesüra tashidak tulu agi shirangdang aser gari lendong ajuruba mapangtem nung senotsü agi yaritsü asoshi telatet tejangja renema lir.
Iba mapa asoshi NPA-i kanga meranga inyakogo aser tang iba tebilemba aser teyongyaba mapa akümba ajanga Nagaland nung osangbenertem ajak tarutsü anogo nung tamangu lendong ajurudang tejenokdak ki ka yanglua ayu ama asütsü ta NPA sangdong nungsa metetdaktsü.
Anungji, iba telemtetba ya tang nungi mapa küma aotsüsa yaktasa state government sen peria agütsütsüla ta metetdaktsü.