NPA-i Osangbenertem shisatokden ayongzüker

Dimapur, Nov.02 (TYO): Nagaland nung osangbenertemi ochimashi mapatem anema koma inyaktsüla (?) ta asüba onük nung shisatokden sentong ka Nagaland Press Association (NPA)-i ayongzüka akatsü lemtetogo.
Iba shisatokden sentong ya tan ita Nov. 13 nungi 14, 2017 tashi Hotel Saramati, Dimapur nung alitsü aser shisalen sayurji New Delhi nungi Nitin Sethi asütsü. Pa ya tang Scroll.in nung Deputy Editor lir. Scroll.in ya online nung osang agütsür telok ka lir. Parnoki talisa yimten aser sobaliba maparen nung India tajungba küma yanglutsü asoshi osangtsüsang aser shisatsü lemsateper.
Nitin Sethi ya tamalena Hindu aser Times of India osangkakettem nung inyaka liasü. Tanga pa ya osangtsüsang prokshiba mapatem nung dang masü saka Indian Institute of Mass Communication, New Delhi aser Ashoka University nunga sayur.
Iba shisatokden sentong dak sendakba mapatem indang tanü Brehostibar nü NPA senden ka mena mapa lemsaogo. Iba sentong ya Directorate of Information & Public Relations (DIPR) nungi teyari agia ayongzüker.