NPA-i sorkar dang metetdaktsür ; Rongchii 1 nungi Aami 30, 2018 tashi membership drive alitsü

Dimapur, Metsüremi (March) 28 (TYO): Metsüremi (March) 28, 2018 nü Nagaland Press Association (NPA)-i Dimapur, Kohima aser Mokokchung nungi Press Club tem den külem senden ka amen.
Press Point, Dimapur nung ayonga amenba senden nung press purtem dak sendakba onüktem aika benoka olemtep aser working journalist talila züngsema NPA akangshitsü atema telemtetba agia liasü.
Senden nung adenertemi state sorkar dang Accreditation Policy tasenba official Gazette ka nung sangdongtsü aser tekaratiba nung ibaji mapa küma tenzüktsü aser accreditated journalists talila kümdaktsütsü atema ayongzüktsü bangzünga renem.
Taküm budget session nung Chief Minister-i Accreditated Journalists indang Operational Subsidy talila ajungkettsü ta ashiba ama sorkari ibaji mapa küma inyakang ta ajungshitsü atema senden nungsa telemtetba ka agi.
Senden nung adenertemisa state sorkari tekaratiba nung Accreditation Committee senden ayonga amentsü aser journalist tem ajangzüktsü atema taoba mapang sorkar nem agüja aliba onüktem agizüka inyaktsü atema takhangba agütsütsü lemtet.
Linük nung tanga state tem nung inyakba ama Nagaland nunga state sorkar Working Journalists atema Pension aser Health Schemes tenzüktsü atema tanü senden nung adenertemisa sorkar dang akhangtsü lemtet.
NPA-i Rongchii (April) 1 nungi Aami (June) 30, 2018 tashi membership drive alitsü telemtetba agi. Nagaland nung küm ka tema mapa inyaka aruba journalist temi NPA nung züngsem akümtsü akok.
Dimapur, Kohima aser Mokokchung nung Press Club temi pei pei züngsemtem NPA nung dendaktsütsü atema ayongzüktsü atema NPA-i mepishia metetdaktsü.
Kohima, Mokokchung aser Dimapur nung aliba working journalist temi pei pei press club nungi membership forms meshitsü akok aser tanga district nung inyakertemi Nagaland Press Association den tongteprateptsü akok ta NPA-isa ashi.