NPCB-i fire crackers atema tetuyuba agütsür

Dimapur, May 06 (TYO): Diwali, Chhath Puja, Khristmas, Küm Tasen, Kiyimba, aser Tasoba Anogo amala benjungbentsü nung fire crackers kanga amshir, aser item ajanga ola aser tangu tamajung adokdaktsür. Iba dak sendakba nung India sorkari Noise (Regulation and Control of Pollution) Rule, 2000 kübok ozüng kar latetogo, ta Nagaland Pollution Control Board-i metetdaktsü.
Iba ozüng ya Deputy Commissioner ajanga mapa küma inyaktsü tashi agütsür aser aonung 10:00 ako nungi anepdang 6:00 ako tashi crackers mapoktsü aser ola 125 decibels tema adokba fire crackers noktanger.
Temalen agüja aliba ozüngtem dak alia Nagaland Pollution Control Board-ia ozüng kar yanglusemer aser itemji, sentong kar nung firework amshitsü lira, jelia bangdak Administration dang nungi temelaba meshitsü tetuyuba lir,  ta NPCB-i sangdong ka nung metetdaktsü.
Fireworks amshitsüpurtemi mozüki, school  aser nisung aliba tesemtem adena orr sentong akatsüla aser parnoki temelaba meshidang mapang aser tesem tejangja metetdaktsütsüla, ta NPCB-isa metetdaktsü.
Ozüng nungsa sentong magidang public tem maoksatsü atema jelia fireworks amshitsü indang osang metetdaktsütsü tetuyuba agüja lir.