NPCB-i sensaksem sentong ka ayongzüka agiogo

Dimapur, Metsüremi/March 7 (TYO): Nagaland Pollution Control Board aser Dimapur District Administrator na longjemer National Clean Air Program (NCAP) kübok Dimapur nung kiyong balala lenirtem den March 7 nü Hotel Saramati, Dimapur nung sensaksem sentong ka ayongzüka agiogo.

Sentong nung o jembiba mapang Deputy Commissioner Dimapur, Dr. Tinojongshi Chang, NCS-i, tzü-mopung aser ali menenba dak sendaka aliba tebilemtsütem bentettsü asoshi tangsa tang jenjang agitsü nüngdaker ta ashiba den tang jenjang tapet magira tarutsü nung timtem tulu ajurutsü, ta shisem.

Paisa, pei ki/kima aser temeket meraka ayutsü koda tongtibang iba indang lemsatepba den nüburtemi merekmejutsü atema sorkar dak dang metaloker aliba ya melenshitsüla, ta ashi.

Deputy Commissioner-i ashiba agi, India ya merekmejua aliba linük ka kümdaktsütsü atema Gandhi nükla aliba tang tashi mataloki lir. Maneni pai kiyong balala lenirtem dang tzü-mopung aser ali menenba dak sendakba nung tebilemdangba tem district administration dangi abentsü ajungshi, koba kanga junga asadangtsü ta paisa tenangzükba agüja liasü.

Kasa mapang nung Scientist ‘B’ NPCB Yanathung Kithan, Scientist ‘B’ NPCB Akangmeren Imchen, Junior Scientific Assistant NPCB Rongsenben Longkumer, Junior Scientific Assistant, NPCB Hanpong Konyak nungeri technical interaction sentong ka achaayanga agi.

Sentong nung Member Secretary, NPCB, K Hukato Chishi, IFS-i lokti pela agizükba o jembia liasü.