NPCC DAC-i züngsem 12 dang nungi kuli meshir

Kohima, October 19 (TYO): Nagaland Pradesh Congress Committee (NPCC)-i züngsem tejen 12 dang nungi kuli meshia show cause notice agütsüogo.
NPCC Disciplinary Action Committee (DAC)-i NPCC züngsem 6, Nagaland nungi AICC züngsem 4, NPCC Seva Dal lennir ka aser taoba INC candidate ka anema iba notice agütsü.
NPCC züngsemtemji Supongmeren Jamir, Vaprumo Demo, Konngam, Sulanthung, Nillo Rengma aser H. Chuba Chang, AICC züngsemtemji K V Pusa, Ashu Keyho, Joshua Sumi aser Tarie Zeliang. Parnok den taoba INC candidate Prasielie Pienyu aser Seva Dal lennir G K Rengma nunger dang nungi kuli meshiogo.
Taküm May ita NPCC tir inyaktsü atema K Therie shimba anema parnoki AICC nem tezüluba ka agütsüba atema NPCC DAC-i show cause notice agütsü.
Ano, taküm September 24 nü senden alidang lennir 12-i parnok pusemertem anir arua senden tiptema magidaktsüi meinprongba aser AICC general secretary in-charge of North East, V Narayanasamy-i NPCC Road Map for Nagaland sayatsü aliba noktangba atema DAC-isa tai tonglokja lir.
Parnokisa pei pei Assembly Constituency nung tirtem anendaktsü aser NPCC anema non-cooperation document nung sign südaktsü ta NPCC DAC-isa aitsür.
Congress MLA 7-i DAN sorkar nung adenba atema AICC-i parnok State Assembly nungi züngdoktsü atema ken o benok saka parnok nisung 12-i AICC ketdangsertema aitsü, ta DAC-isa shia lir.
Parnok nisung 12-isa Congress indang sentong aser telemtetba anema osang prokshi aser party tenüng menüktsütsü merang, ta DAC-isa aitsür.
Parnoki anogo 14 tsüngda (November 2 matongdang) telangzüba agütsütsüla aser itemji NPCC Executive Committee dangi abentsü, ta NPCC DAC-isa metetdaktsü.