NPCC-i benjung salem lemsateper

Dimapur, December 21 (TYO): NPCC lenirtem aser party nung inyakertemi state nübur ajak den Tepela Khristmas aser New year salem abener; Naga nungeri Yisu Khristaji Tsüngrem chir lir, aser alima nung menenpurtem kümzüktsü atema yok, ta amanger, anungji asenoki Pa dak amanger, ta tanü NPCC Tir, K. Therie-i sangdong ka ajanga metetdaktsü.
“Asenok benjungtepdang asen linük tesem kar nungbo Khristantem reshikangshiba osang angashia mepelar. Asen linük nung jok Khristmas carol atenbajia ozüng alema inyakba ka kümogo. Khristnam mongra majungtsü ta Khristantem amokmerener. Tenla kitem raksatsür, Mission aser Charity mapa atema senotsü yokba lenmang shibangtsüogo aser tanübo theology azüngertem indang scholarships-a magütsür. Onok Congress züngsemtemi itemji magizüker,” ta sangdong nung shia lir.
“Hindutva fundamentalists-i nüsüng ishiba aliba tamangba yimsütem anema shisatsü nung rara ayongzükogo. Iba ya bendangshidanga inyakba dang masü, ajisüaka parnoki linük nung Khristantem samatsüner,” ta kasa sangdong nung shia lir.
“Onoki shisashirtem, minority tem aser talisa Khristan züngsemtem dang tamangba yimsü nung tim mesüi inyakba anema raratsü ayongzüker,” ta NPCC-i metetdaktsü.
“Iba ama tensa ka nung asenok atema nokdaktsüpur shinga malidang Congress Tir tenangzükba agidang Rahul Gandhi-i linük minotirty tem atema nokdaktsü ta linük tsüngdang nangzükogo. ‘Congress-i linük aso 22bubai ani, ajisüaka tanü Ato kilonseri tesüleni anir aoer, kong nisungtem bendanga tepseter, parnoki amangba yimsü atema azüker aser parnoki achiba chiyungtsü atema tepseter’,” ta sangdong nung shia lir.
“NPF aser BJP Naga nungertemji-a Khristantem lir. Item ama jenokdaktsütsüji tai ta parnokia bilema alitsü ta ni amanger,” ta pai ashi.
Iba benjung mongpu nung asenoki asen tamang nung akhanga nokdakdi aser Khristan chichiba tanela nung Khristmas mongdi. Onoki senso ajak dang tepela Khristmas aser New year salem lemsateper,” ta parnokisa metetdaktsü.