NPCC-i BJP anema ECI dangi shidi zülu

Kohima, Rongjui (September) 24 (TYO): BJP-i Nagaland kübok polling station tem nung election symbol (Lotus) yanglutsü sentong atema tenokdangba agüjang ta Nagaland Pradesh Congress Committee (NPCC)-i Election Commission of India (ECI) dangi shidi ka züluogo.
“September 18, 2018 nü Nagaland BJP President office ajanga party taginüba nung ajemdaker aser Central Headquarters nungi tetuyuba anguba ama BJP MLA 12 pronglai pei pei Mandal President tem dang polling station shia nung party symbol (Lotus) yanglutsü tetuyuba agütsür ta metetdaktsü. Pei pei constituency nung aliba polling station shia nung party symbol (Lotus) pungugu yanglutsüla aser ibaji October 5, 2018 matongdang inyaktsüla ta paisa tetuyuba agütsü” ta NPCC tatong tir Khriedi Theünuo-i ECI dangi züluba shidi nung shia lir.
“Election guidelines nung polling station ka anasa meter 200 telongtet nung political party office malitsüla ta shia lir. Ajisüaka, BJP Nagaland President-i State BJP MLA tem dang polling station tem nung party noksa yanglutsü tuyubaji election guideline alema inyakba mapa ka lir” ta Theünuo-isa metetdaktsü.
Iba inyakyim ya public tesemtem menenmejiba lir kechiyong Nagaland state nung polling station teimba ka schools (government mesüra aided), government mesüra semi-government institutions lir, ta paisa ashi.
ECI-i Nagaland nung polling stations lemzüktsüba State District Election Officer tem dang BJP noksa yanglua aliba polling station tem list nungi agientsü atema tetuyuba agüjang ta Theünuo-isa shidi nung shia lir.