NPCC-i ‘by-election’ anema ken o benok

Kohima, July 3 (TYO): 10-Northern Angami-I Assembly Constituency nung by-election magitsü atema Nagaland nung Congress-i okadak ‘stay order’ atema ken o benokogo.
Representation of People Act, 1951 Arrla 151A nung ajemdaker, Congress-i July 29, 2017 nü by-election agitsü aliba atema ‘stay order’ agüjang ta okadak ken o benok.
Iba osang ya tanü Nagaland Pradesh Congress Committee (NPCC) president, Kewekhape Therie-i metetdaktsü.
“Act nung, assembly tembangtsü mapangji küm ka majung süra, by-election magitsü ta shia lir. Iba tetuyuba kübok Nagaland adener, anungji onoki by-election magitsü atema ken o benok” ta Therie-i ashi.
“Sangküm küm tetenzüklen State Assembly indang general election agitsü lir. Iba atema taküm December ita nungi Election Code of Conduct tenzüktsü aser ibaji joko ita ishika dang lirbo tenzüktsü. Anungji, by-election magitsüla” ta paisa shisem.
“Tanü onoki Gauhati High Court indang Kohima Bench nung ken o benok saka Obendangeri notice agütsünüba agi onoki meyipa agi aser asüng tashi nung temaba okadak ‘stay order’ atema ken o benoktsü” ta Therie-isa metetdaktsü.
June 29, 2017 nü Election Commission of India-i Kohima district kübok Northern Angami-I Assembly Constituency indang by-election agitsü osang metetdaktsü.
May 24, 2017 nü MLA Khriehu Leizietsu-i pa tebu aser Chief Minister teinyakdak Dr. Shurhozelie Liezietsu nem lenmang lapokja, iba menden toktsü.
Tanü Therie-isa ashiba agi, Congress teloki Nagaland nung agiba elections nung Electronic Voting Machine (EVM) mamshitsü atema writ petition ka benok.
“Election Commission-i EVM den paper trail amshitsü magütsüra, ballot paper dang amshitsüla. Nagaland ama state nung constituency shia vote agütsür 20000 shi dang lir, anungji vote azüngtsübaji tasak masü” ta paisa metetdaktsü.
“Paper trail medeni EVM amshiba nung tashishitsü keta lir, aser iba jagi nisungtemi EVM nung temulung malemer” ta paisa shisem.
“Japan dena linüka aika nung EVM amshiba nokdangogo. Alima nung electronic tsütsü temaba menden nung Japan lir, saka parnokia EVM dak temulung malemer süra, asenoki kodasür temulung lemtettsü” ta NPCC President-isa ashi.