NPCC-i maneni state MGNREGA scheme indang bushisüngdangtsü akhanger

Kohima, June 09 (TYO): NPCC-i MGNREGA atema temepishiba benokba nung Nagaland Angh-i inyakba atema pelar, ta tanü NPCC Tir, K. Therie-i sangdong ka ajanga metetdaktsü.

“Küm aiaka state nung menani MGNREGA senotsü tim mesüi agir. Sen agizükba nungi yim aikati shilem asemsü nungi shilem kata mangu, Congress-i takhangba agüjaka state nung Lok Ayukta mali. Talisa Vigilance Commission (State) nung ken o aika anünga lir. Iba dak alia Vigilance Commission-i meinyakdangyongi sorkari sorkar mapa inyakertem anema bushisüngdangtsü melaba ya-a tetsüktaktsü tulu ka lir,” ta kasa sangdong nung shia lir.

Anungji NPCC-i maneni Nagaland Angh dang state nung MGNREGA scheme indang bushisüngdangtsü asoshi retired High Court Judge ka lenisüba nung Impartial Inquiry Commission ka shimtsü akhanger, ta NPCC-isa sangdong nung shia lir.