NPCC-i NPF government mapatem aitsür

Dimapur, Oct.04 (TYO) : Nagaland nung NPF teloki aniba DAN government ya ochimashi mapa tulu inyaktsü akokba tashi tulu adenba government lir, parnok dak yimten khuret mali aser tatar senden nunga tasüngdangnütsü asüngdanga jembitsü makok kümogo, iba jagi government senpong nungi sen agizüka amshi akoktsü mechi tatar senden minute terpongo mener senshir ta Nagaland Pradesh Congress Committee-i metetdaktsüogo.
Linük nung BJP telok alidak Khristan purtem reshikangshiba mapatem NPF teloki kanga junga meteta lir, anungji NPF telok BJP den külem ser inyakbaji Khristan tamangba yimsü anema lir, anungji Khristan-temi iba ama yimten telok ka yaritsübaji tim masü ta Congress telokisa metetdaktsü.
DAN government kübok nübortem asüktemer, iba tensa tia nung Tuensang aser Kiphire district nung kin o kin na tsüngda mangatettep adoka lendong atalokdang nisung aika taküm samaogo aser kaketshir aser government mapa nung inyakertem dena nisung 1400 dak tali talikdak maka kümogo. Iba kasa lendong nung government-i menokdangtetba agi kiojen aika raksadaktsüogo aser item takoksatemji tang tashi government-i memenoktsüteter ta NPCC-isa metetdaktsü.
Nagaland state budget sen crore 14,000 kongi aor memetet samaogo aser Center nungi sentong tapu balala (CSS) inyaktsü yokba sen ochishia mamshir. Taküm 2016 küm July ita nung MGNREGA sen crore 470 yok saka iba senji yimtaklirtem nem magütsüi MLA-tem nisung shia crore kaka alemba otsü angashia lir. Ibayongji, iba ken o ya NPCC-i Nagaland angh nem bushisüngdangtsü asoshi agütsü saka pai kecha mapa küma meinyak.
Nagaland angh-i state nung ochimashi mapa inyakba indangbo kanga jembir saka ochimashi mapa anema inyaktsü atema takangba agütsüba ken o nungbo kecha mapa küma meinyaker ta Congress telokisa jashia metetdaktsü.
Nagaland nung terenlok mapa inyakbatem ajak anena lir, gari lenmangtema ayong amai kümogo. Tangarbo gari lenmang tuluba, apu tajungba, metro train senzüba lenmang aser tayimtsü jajaba mapatem ajak tajungba küma inyaka aor saka asenokbo lenmang tapoka mateptet kümogo, tangar tejakleni aor aser asenok tesülen 19th century bushia tesüleni odagi ta NPCC telokisa metetdaktsü.
Nagaland nung yimten tashi ya nübortem asoshi masü pei kija ajungtsü bilema inyakba nisungtem ket nung lir, parnoki tebang agi o tajung jembir saka mapa nungbo nübortem meyong rongsen rakzüker, parnok dak nübortem asoshi inyaktsü yimten tejangraba mali, anungji iba government ya agientsü atema nübortem longjemer inyaktsüla ta Congress telokisa aitsü.
Item ken o ya NPCC lokti senden September 28, 2016 nü amendang lemtetba pangzüngtem liasü ta parnokisa metetdaktsüogo.