NPCC-i SC nung Congress MLA 8 anema ken o benok

Kohima, Feb. 17 (TYO): 2015 November ita Nagaland State Legislative Assembly Speaker-i Naga Peoples’ Front (NPF) nung adener Congress MLA 8 indang disqualification petition magizüktsü lemtetba anema Nagaland Congress-i Supreme Court nung special leave petition ka agütsüogo.
“State Assembly Speaker-i Congress MLA tem NPF nung lokteptsü melaba ajanga parnok anema agütsüba disqualification petition magizük, aser iba telemtetba anema onoki February 9 nü Supreme Court nung ken o ka benokogo” ta Nagaland Pradesh Congress Committee (NPCC) Tir-i tanü metetdaktsü.
Yaküm November 20 nü Congress MLA 8-i NPF nung adenba sülen September 4 nü Congress-i parnok anema disqualification petition agüja aliba Speaker-i agien.
Gauhati High Court-i ozüng agütsüba nung ajemdaker Speaker-i disqualification petition ji agien. Ajisüaka, Congress-i onük ana nung ajemdaker Supreme Court nung ken o benok, ta NPCC Tirisa metetdaktsü.
Mezüngbuba onükji, Congress MLA 8-i original party (Indian National Congress) tetuyuba anema membership toktsür tanga telok kati aniba sorkar nung teinyaktsü wadang agizükba lir. Iba ya 10th Schedule nung Arla 2 kübok lateta aliba anema inyakba lir, ta paisa ashi.
Tanabuba onükji, original party nungi telemtetba magii tanga telok ka nung adenba lir aser iba ya 10th Schedule nung Arla 4 kübok lateta lir. Congress MLA 8 jagi NPF den adentsü lemtet saka Congress Party-ibo NPF den adentsü telemtetba magi, ta NPCC tirisa shisem.
Linük Temzüng nung 10th Schedule nung ammeter onoki Supreme Court nung ken o benokogo aser ozüng nung aliba ama temeten angutsü imlar, ta paisa metetdaktsü.