NPCC-i T.R.Zeliang mapa aitsür

Dimapur, May 24 (TYO) : Taoba election mapang election nung tokteptsü asoshi tenüng agütsüba mapang Wb.T.R.Zeliang-i pa tazüngba degree tiyazü agütsü ta aitsüba ken o bendangtsü asoshi tawa Gauhati high court, Kohima bench-i Judicial Magistrate First Class, Peren nem nungloktsüba sülen paji Peren nungi tangleni yokbaji taoksatsüka lir aser iba maparen indangji kanga süoki ia bilemer ta Nagaland Pradesh Congress Committee (NPCC)-i metetdaktsüogo.

Tang ajungbena Peren aser Phek na nung aliba  Judicial Magistrate First Class melentepba mapa jagi obendangba maparen nung inyakertem dak temulung malemtsüsa adoker. Iba ama tensa ka nung T.R.Zeliang dak aketba ken oji Peren nung angadangtsübaji tim masü kechiyong paji Peren district nungi lir, anungji ochiobendang agütsütettsü atema iba ken o ya tangalen okadak ka nung bener oa angadangtsüla ta NPCC-isa metetdaktsü.

Wb.T.R.Zeliang tazüngba degree dak aketba ken o nung okadak nungi pa mapang nung obendangtsü saka NPCC-ibo T.R.Zeliangi tiyazü tazüngba degree amshiba indangji maneni tuteta metetdaktsütsü ta NPCC Working president, Wb.P.Ayang Aonoki metetdaktsüogo.