NPCC-i “The Future” omen nung sentong agitsü

Dimapur, August 7 (TYO) : August 16-20, 2016 tashi ‘The Future’ omen nung ajemdaker NPCC tour agitsü aser iba sentong ya lanur asoshi aria bilemja ayongzüka agitsü, ta NPCC President, K. Therie-i sangdong ka nung metetdaktsü.
NPCC tour mezüngbuba shilem nung Kiphire, Shamator, Tuensang aser Mokockchung semdangtsü aser Lumami Nagaland University nung Freshers Day amungtsü.
“Asen sorkar inyakyim nung süpokrem, ochimashi aser tashiyim agi sen meshiba sobaliba tentetogo. Sorkari senotsü dak sendakba maparen nung tamakok aludaktsüba ajanga rongsenren mangdang mali aser mapa adoktsü lenmang mali kümogo,” ta NPCC President-i sangdong nung shia lir.
14 Finance Commission-i non-plan sen aika lemzüktsüaka, state sorkari itasena dena mapang shitak nung magütsüteter. Budget nung talila endokba aser Debt Servicing kanga aika kümogo aser sentsühji tanübo moudoktettsü, ta paisa ashi.
“Tanü asenoki sentsüh tsüdenba ya asüng asen lanuputu aser parnok chirnur nem benloktsütsü. Nagaland tarutsü atema asenok külemi longjemer inyaktsüla. Linük Temzüng ajanga senso shia election maparen nung shilem agitsü temeten agütsür. Election nung vote agi masü saka süpokrem agi takok angur aser asen nisungtemi Tsüngrem dang nungibo sen ang tetsübuba kümogo. Iba tangatetba ajanga asen Nagaland tarutsü tia majungtsü” ta K. Therie-isa ashi.
Onoki, NPCC roadmap yangluogo aser iba nung onoki aginüba tarutsü tia sayua lir. Democratic Government chichiba tentettsü atema onoki nübortem den ajurutepa sensaksemnür. Anungji, August 16-20, 2016 NPCC tour mapang nisung ajak arua sendentem nung adentsü akok, ta paisa shisem.