NPCC Tir, CNTC aser NDPP 5 Ghaspani-II A/C-i mangyimer

Dimapur, Rongjui/September 23 (TYO): Sericulture & Excise Advisor, Imtikumzuk Longkumer asüba osang angashia mangyimer kibong den mangyimba lemsateper, ta tanü NPCC Tir, K. Therie-i sangdong ka ajanga lemsatep.
“Asür, Imtikumzuk Lkr ya nübur jenjang ajungkettsütsü atema meranga inyaker rongnung ka liasü. Mapang talangka nungi yimtenren nung inyaker asünungji 26- Aonglenden AC nung aliba nüburtemi 2013 aser 2018 General Elections nung pa shimtetbaji tim dang,” ta paisa ashi. “Pa anojungi asüba ajanga nüburtemi takoksa tulu nguogo, kechiyong pa nübo tajungtiba mapang nung alima nungi pilaogo. Pai lokti aser state atema tajung jenti inyaktsütsüsa liasü. Pa asüba ajanga ongdang ka adokogo. Pai lokti aser nübur tenzüka aruba aser mapa tajungtemji teti bilemtettsü,” ta paisa ashi.
“NPCC lenirtem aser züngsem ajaki iba ama asükhu mapang nung mangyimer kibong den mangyim jashi lemsateper aser Tsüngremi nenok ajak nem tesünep agüjang ta sarasademtsür. Asür tanela tesünep nung anisüngzükdakjangma,” ta kasa sangdong ajanga lemsatep.
Ano tanga sangdong ka nung Central Nagaland Tribes Council (CNTC)-i Sericulture & Excise Advisor, Imtikumzuk Longkumer mapang tatsüka shirangba sülen Apollo Hospital New Delhi nung anojungi asüba osang angashia mangyimer, ta metetdaktsü.
“Pa asüba ya CNTC atema takoksa tulu. CNTC-i mangyimer kibong den mangyim lemsateper, aser Tsüngremi iba ama asükhu mapang nung parnok nem tashi tasen den tesünep agüjang ta sarasademtsür,” ta CNTC Media Cell-i lemsatep.
Maneni tanga sangdong ka nung NDPP 5 Ghaspani-II A/C-i, takutet lenir, Imtikumzuk Longkumer New Delhi nung ajungbena asüba osang angashia mangyimer, ta tanü NDPP 5 Ghaspani-II A/C nung ketdangpurtemi metetdaktsü.
“Pai lenir ka ama nüburtem rongnung mapa tajung inyakbaji memelentettsü. Pa yimtenren nung aliba mapang piyong pai shimtetba lenir ka ama tangar tenzüka aruogo. Mangyimer kibong den onoki mangyim jashi lemsaba den külemi taochi aketba Tsüngremi kibong züngsemtem sünepjang, aser leniri tatishitsü tajung sayuba ajanga ajak moajang,” ta kasa sangdong ajanga lemsatep.