NPCC Tir-i assembly session agiba aitsür

Dimapur, July 15 (TYO) : July 12-14, 2016 tashi Nagaland State Assembly session agitsü indang osang metetdaksüba sülen administration aser police-i kanga dang meranga security aser traffic atema maparen inyak. MLA aser Minister tem timtem melii senzütsü atema state yimtiba kübok tesem aika nung public senzüsenbongba noktang, ta NPCC President, K Therie-i sangdong ka nung metetdaktsü.
Assembly tenzükba anogo Ministers’ Hill nungi Nagaland State Assembly tashi police escort temi meiner MLA tem adenshi saka parnok minute 15 dang Assembly menerbo senshi. Minute 15 amenba sülen parnok tasüng sodi agi aser Brihostibarnü parnok adenshir St. Joseph’s University Bill, Nagaland salaries, allowances aser Chief Minister / other ministers… (Fifth Amendment) Bill, 2016 nungertem benoka agizükba sülen senden tembang, ta K Therie-isa ashi.
State Assembly nung question hour dena maliasü aser iba ya ajanga asen MLA temi pei pei Assembly dak sendakba onüktem atema süoki ia mebilemtsüba sayur. Parnoki Nagaland yimten tebilemtsü tekaratiba nung latettsü atema külemi longjem ta jembir saka assembly nung iba khuret koktettsü atema onük ka danga benoka mejembi, ta paisa aitsü.
Taoba mapang Nagaland Legislative Assembly ya State Assembly tem rongnung kanga dang tashitait liasü. Tesüiba mapang assembly nung tetsübu mesüra talenba kecha melii onüktem benoka olemtep aser telemtetbatem agi aser item jagi asen state len sayua aru. Opposition takang aliba ajanga ochimasü inyakyim noktang aser ochimashi inyak ta putetba Minister mesüra ketdangser ka danga metoktsüi ozüng tapet agi merenshitsü, ta NPCC Tir-isa sangdong nung shia lir.
Tanü NGOs aser opposition teloktemi onük balala atema ola adoker saka state sorkari mapa shitak meinyakteter. Department balala nem ita aika itasen magütsüi arur, CSS funds ano magütsü, CAG-i department balalai senotsü timi mamshiba indang onüktem benoka lir aser back-door appointments indang ken o aika adoka lir. Ajisüaka, assembly session nung item onük ka danga mebenok aser asüpila sentong ka agir ama dang agiogo, ta K Therie-isa ashi.