NPCC tir K. Therie-i Naga yimden aser CAA tebilemtsü indang jembi

NPCC tir K. Therie-i Mokokchung semdangba mapang telok balala nungi lenirtem aser Congress party pur kar densema noksa nung angur. Mokokchung, February 24, 2020.

Mokokchung, Feb 24 (TYO): Nagaland Pradesh Congress Committee (NPCC), tir, K. Therie-i anir par külem party lenirtemi Feb 24 nü Mokokchung semdanga yangi Hotel Metsüben nung public meeting ka menogo. Iba senden nung Watsü Mungdang, All Ward Union Mokokchung, Mokokchung Town Lanur Telungjem (MTLT) nungi ketdangsürtem arua aden.
Senden nung K. Therie-i jembidang, tang koba Naga Political Solution indang tatembang kadi arua Oct 31, 2019 nü jembiogo, ibaji NPCC-ia pela shishia agizüker, aji saka, tawa tanü nungi onük kar bendenloksemtsü merangba angashir aser ibaji Nagaland nung aliba Naga nungertemi khenyongi magizükteter, ta metetdaktsü.
Naga solution indang Oct 31, 2019 nü tatem kadi arua jembiba tashi nung PAN Naga onükji sobaliba aser shisatsü nung angatettepa alitsü (culture and emotional integration) atema dang shisema liasü, saka tawa ka nungi PAN Naga onük nung talila onük aika inoksemtsü asoshi inyaksangshiba osang angashir, anungji, ibaji khenyongi magizüktetter, ta ashi.
Naga nunger kümzüka alitsü atema India temzüng kübok arla 371 (a) nung teperi lir, anungji, iba dak sentakba nung PAN Naga onük nungji talila aika inoktsü madoker, ta paisa jangjashitsü.
Paisa CAA anema jembidang, iba ya ajanga tarutsü nung asen lima ya bendangeri amokseptsü ana nung lir, anungji, iba ya asenok asoshi lendong tulu aketba Act ka, ta ashi.
ILP yagi asenok mekümzüktettsü, kechiyong iba ya senzüsenpongtsü atema melaba (travel permit) ka dang lir, CAA yagi tamangba yimsü aser asen lima nung teraksatsüba jenti bener arutsütsü angur, ta paisa shisem.
BJP yimsüsüba mapang parnoki CAA mapa kümogo aser meilongi ano Uniform Civil Code (UCC) bener arutsü parnok teinyaktsü nükjidong lir, item ajakji mapa kümra asenok ya timtem tulu adoktsü, ta paisa tekümdangtsü o ka ashi.
“Ni political party ka nungi asünung, aikadi ni politics jembitsü amai arendaker, saka Naga political solution aser CAA (NPR/NRC) onük yabo nüburtem ajaki meteta alitsü tim asüba yong tsüngdong arua tebilemba ashitsü meranger, ajaki iba onük yago aroka bilemdangtsü junger aser tejakleni arua shilem agidaktsünür”, ta paisa ashi. “Tesülen inyakatokerbo ola adok nunga nungdak malitsü”, ta paisa shisem.
K. Therie-i tawa ka nungi iba kasa onük dak sentakba nung Mon, Longleng, Kohima, Phek, Kephire, Tuensang, Mokokchung district-tem semdanga nüburtem den ajurutepa jajar aser pai ano kopi melii Zunheboto, Wokha aser Peren district-tem semdangtsü sentong lir, ta angazüker.