NPCC Tiri kaketshirtem dang ochimashi anema inyaktsü ajungshi

Dimapur, August 25 (TYO): Nagaland nung kaketshirtemi Tsüngrem tsübuba government asoshi inyaktsüla aser ochimashi aser sübokrem mapatem nokdangtsüla, ta Nagaland Pradesh Congress Committee (NPCC) tir K.Therie-i metetdaktsüogo.
Pai iba o ya Bodbar nü Nagaland University Students’ Union, Lumami purtemi tasenpur agizükba sentong ka nung tongti tesemdanger o jembidang metetdaktsü.
Tanü Nagaland nung mapa manguba ajanga lanurtem aika bendangleni aor saka parnok rongnung aika timtem toushi tulu ajangshir meyipa arur. Iba ama tensa tiaji tajungba kümdakja Nagaland nung lanurtem mapa inyaktettsüsa tensa tia yanglutsübaji kanga tongtibang kümogo ta Therie-isa metetdaktsü. Kohima aser Dimapur nung Naga lnunger lanurtemi inyaktettsüsa mapa aika lir saka asenoki itemji maongka küma magitetter, anungji item maongkatemji agitettsüsa kaketshirtemi bilema inyaktsüla ta paisa ashi.
Nagaland nung sübokrem aser ochimashi mapatem agi terenlok mapatem ajak anendaktsüogo. Joko, election nung madokertem sentsüh makok kiojen yokdokmar aser adoker yimsüsürtemi nübortem meyong chimatsü ta NPCC tir-isa ashi.
Paisa ashiba agi, Nagaland nung Congress telok ya NNO telok purtemi akümba lir aser 1972 küm NNO mapang Pfutsero nung Naga yimten tebilemtsü ya yimjung nung temzüngi melaba ama latettsü merangtsü ta latetba ama tanü tashi iba tangatetba nung nokdaka lir ta paisa ashi.
Paisa Naga nunger kaketshirtem dang tanü alima maparen ajak nung karaa melenshia aoba nung shilem tajung agitettsüsa tarutsü atema mangdang tajung yur meranga azüngtsü ajungshi.