NPF 23 Impur AC pur ketdangpur tasen shimogo

June 21 nü Kobulong nung NPF Mokokchung Division Moasangba Jamiri 23 Impur AC NPF pur ketdangpur tasen shimba maparen inyakdang tangokba noksa nung angur. Kobulong, June 21, 2016
June 21 nü Kobulong nung NPF Mokokchung Division Moasangba Jamiri 23 Impur AC NPF pur ketdangpur tasen shimba maparen inyakdang tangokba noksa nung angur. Kobulong, June 21, 2016

Kobulong, June 21 (TYO): Mongulbarnü Kobulong nung Naga People’s Front, 23 Impur Assembly Constituency pur ketdangpur tasen shimba sentong ka agiogo. Ketdangpur tasen shimba maparenji NPF Mokokchung Division, tir Moasangba Jamiri akhüm keta ketdang süa liasü.
Tir, Moasangbai iba sentong nung jembidang, Congress party nungi arur tenzüker ajak pela agizükba den taoba mapang meputep alibatem ajak amadoker külemi teka amteper party tashi ita bener aotsü asoshi ayongzüka liasü.
Party pur lungjema lira taruba 2018 election nungjibo NPF-i Mokokchung district nungi menden 10 prong agitsü, ta paisa teimla o ka metetdaktsü.
Iba sentong nung Parliamentary Secretary for Geology and Mining, Dr. Imtiwapang Aier densema paia mapang tatsüka agia jembidang, NPF party-i taoba mapang Congress party nung alirtem agizükba asoshi pelaba lemsatepa liasü.
Paisa congress legislator-temi DAN sorkar nung adenba kuli kar ashidang, “Naga nunger asoshi inyaktsü aser Naga yimten tebilemtsü alibatem telatetba ka dangi bener aruba nung yaritsü nükjidong yur aden”, ta metetdaktsü.
Paisa ashiba agi, Congress aser NPF party teinyaktsü nung keta aliba (manifesto) nung Naga yimten keno indang shia lir, anungji, Congress legislators-temi iba nungji nungittsü asoshi DANsorkar nung aden.
Taoba 1998 election nung Naga nungeri mulungba nung masü congress-i tai tuluka inyak, anungji, iba kasaji aibelen masütsüsa onok congress legislator 8-i telemtetba agir NPF nung aden, ta paisa ashi. Joko talangka melii election arutsü asen jakdang wadang lir, anungji, NPF party pur ajak lungjemer taruba election nungjibo menden 10 prongla agitsü nükla yur nendaka inyaktsü paisa tayongzükba agütsü.
Tang tasen shimer NPF Impur constituency ketdangpurtemji; Takomeren (president), Limawapang, Tekawapang aser Maongkaba (vice presidents), Lipoktemsu (Longjang), Masazulu aser Lipoktemsü (Mopungchuket) parnokji general secretaries aser Shiluyangba aser Imtisama tena secretaries, aser Imkongnukshi Treasurer ta shimogo.
NPF Mokokchung Division president, Moasangba Jamiri 23 Impur AC NPF Treasurer kidang NPF wako atsüketa yutsüogo.

You must be logged in to post a comment Login