NPF 26 Aonglenden Assembly Constituency kimen mesemtetogo

Ungma (Mokokchung), April 04 (TYO): Naga People’s Front (NPF) 26 Aonglenden Assembly Constituency kimen mesemtetba sentong ka, senyur I. Kilang Jamir kidang April 4, 2019 anogo Ungma yimtak agia NPF Mokokchung Division president Moasangba Jamir-i Party wako mesotsü aser taruba Lok Sabha aser 26 Aonglenden Assembly by-election nung Congress party candidate yaritsü telemtetba akangshia renemogo, ta Media Cell, NPF Mokokchung Division-i sangdong ka nung metetdaktsü.
Kimen mesemtetba sentong nung Moasangba Jamir-i party tenzükertem dang taruba election nung takok ngutettsüsa kanga nendaka aser ochishia inyaktsü ayongzük.
Paisa nüburtem ajaki Naga nunger temeden atema ola adoktsü mapang tongogo ta ashiba den külemi PDA sorkar tiyazü temesüzükbatem nem mashiokdaktsütsüsa kümdanga alitsü ajungshia, “Parnoki ‘2018 general election mapang ita trok tsüngda Naga yimtenren keno bentettsütsü nangzükba tang tashi mapa mekümtsüi lir,” ta ashi. Paisa party ana longjemer tamangba yimsü tebendang makai akümtsübua amshiba secular party candidate nem takok bener arutsütsü ayongzük.
Kasa sentong nung 26 Aonglenden assembly constituency by-election atema Congress candidate Alemjongshi-ia NPF party tenzükertem dang secular party nem takok bener arutsütsü atema meranga inyaktsü ajungshiba den Naga nunger temeden atema nokdaktsü ayongzük.
Kimen mesemtetba sentong nungsa NPF central lenirtem rongnungi Lendinokdang, V/P aser Mokokchung district asst. incharge, Dr. Watizulu V/P aser Nungsanginba general secretary nungeria adenshia alirtem ajungshia arok longjemer takok bener arutsüsa meranga inyaktsü ayongzük.
Yarang Imchen, General Secretary (Admin) ajanga ketdangsüa aniba kimen mesemtetba sentong nung NPF 26 Aonglenden A/C president R. Limakumzuk-i adenertem pelaa agizükba O jembi kong NPF 26 A/C ketdangpurtem rongnungi general secretary Tsuknunglemba aser Mapulemba aser Secretaries Lanuchuba, Tongpang, Waitemjen aser Ponen Longchar nunger den külemi Aonglenden A/C nungi Unit officer-tem aser Divisional Office Bearers dena liasü.