NPF 9th Kohima Town AC-i pelar

Kohima, Rongchii/April 12, 2020 (TYO): Novel Corona Virus (COVID-19) wara prokshiba azüoktsü asoshi Nagaland state nunga maparen ajunga shibanger aliba mapang, nüburtemi tetuyuba sülen tashi anga anidakba atema pelar, ta NPF 9th Kohima Town Assembly Constituency-i tanü metetdaktsüogo.
Iba ama tensa ka nung nisung aika chiyungtsü mengui timtemer aser itemji asadanga NPF 9th Kohima Town AC-i sensaker nem teyari agütsüogo, ta parnokisa ashi.
Dr. Tseilhoutuo Rhutso lenisüba kübok NPF 9th Kohima Town AC-i, Kohima jila kübok Ward aser Colony balala nung political telok tebendang kecha melii sensaker aser nüngdakbapurtem nem teyari agüja liasü.
Iba ama tenla agütsüba mapa balala inyakba mapang, züngsemtemi nübortem dang lokti nungi pilar alitsü asoshi achaayanga reprangshimdar aser iba wara nungi kümzüka alitsü asoshi nüburtem dang kidang kilung nung kazütsü atema maneni ajungshidar, ta parnokisa ashi.