NPF & BJP-i lokti tentettem dang ULB election agidaktsütsü atema mepir ; Candidate 13-i CPO dang parnok tenüng meyipa agitsü nangzük

Kohima, January 8 (TYO): Nagaland sorkar abenba telok ana- Naga People’s Front (NPF) aser BJP nati tanü urban local bodies indang elections anema nokdakertem dang, elections timi agitettsü aser asüng tenüng agütsütettsü atema lenmang sadema lapokjang ta mepishiogo.
Deobarnü Chief Minister T.R Zeliang-i party ajak jatepa rongdak senden ka amenba sülen iba temepishiba ya metetdaktsü. Kohima nung CM indang residential office nung sendenji amen.
Senden nung NPF President Dr. Shurhozelie Liezietsu, Rajya Sabha MP & NPF Secretary General KG Kenye den party ketdangsertem, BJP (Nagaland) President Visasolie Lhoungu den Vice President Imsu Yaden o General Secretary Eduzu Theluo aser Nagaland Pradesh Congress Committee tenüng nung general secretary Medokul Sophie aser Secretary Moa Imchen nungertem aden. Senden nungsa Home Minister Y. Patton aden.
Linük temzüng Arrla 243T nung tetsür nem local bodies nung shilem lemzüktsüba ajanga Arrla 371A mekongshir ta asüba onük senden nung benoka olemtep, ta Chief Minister’s Office sangdong ka nung metetdaktsü.
Ajisüaka, olemtep tembangba mapang NPF aser BJP teloktemi dang ULB elections dak sendakba onük asoshi lokti tentettem dang mepishitsü lemtet.
State sorkari Honibarnü ULB elections atema tenüng agütsüba anogo asüng nikongdang 3:00 ako tashi atsülanga liasü.
Kohima aser Mokokchung Municipal Councils den Medziphema, Changtongya, Tuensang aser Mon Town Councils nung tenüng ka danga magütsüba council tem nung iba mapa inyaktsü.
Yashi tashi nung candidate 558-i tenüng agütsüogo aser külen Angami Public Organisation (APO), Ao Senden o Chakhesang Public Organisation (CPO) temi pei nisungtem dang January 17 tashi nung tenüng agüja aliba meyipa agiang mesüra pei pei kin nungi jendoktsü ta tetuyuba agüja lir.
Nagaland ULB elections atema tenüng meyipa agiba anogo tatembangbubaji January 17 nü asütsü.
CPO vice president Ariyi Nienu-i ashiba agi, par kin nungi nisung 13-i Phek district kübok council balala nung tenüng agüja aliba meyipa agitsü ta tenangzükba agiogo aser ano tanüngba nisung 56 den iba atema jembidar.
Phek district kübok Phek, Chozuba aser Pfutsero Town Council tem nung tetsür 20 dena nisung ajak agi parnok 69-i tenüng agüja lir.