NPF CEC-i Dr Shurhozelie nem General Convention ayongtsü tashi agütsür

Dimapur, October 20 (Agencies): October 17, 2017 nü Election Commission of India(ECI)-i NPF party sasep nung mangatettep angatetteptsü tetuyuba agütsüba pelashishia agizüker, ta Naga People’s Front nung Central Executive Committee-i metetdaktsü.
Iba tetuyuba nung ajemdaker Party President Dr Shurhozelie Liezietsu dang November 22, 2017 anepdang 11:00 ako nung Khuochiezie mesüra IG Stadium nung General Convention ayongzüktsü tashi agütsür, ta Hokolbarnü NPF CEC senden nung telemtetba agiba osang Resolution Committee ajanga metetdaktsü.
NSCN (IM) aser India sorkar tsüngda tang teinyakdak yimjung maparen pusema nungiter aser maneni India sorkari Naga National Political Groups nung Working Committee olemteptsü atema jaokba pelashishia agizüker. Naga yimten tebilemtsü ya ajak dena lemtettsüla ta NPF-i maneni shiyonga arur telemtetba ka agitsü atema ajaki yariteptsüla aser Naga nungeri aginüba ama NSCN(K)-ia India sorkar den yimjung olemtep alitsü atema mepishia metetdaktsür, ta sangdong nungsa shia lir.
NPF nung menden raktepba onükji party sasep indang onük masü ta shia Governor PB Acharya-i ozüng alema Dr Shurhozelie-i aniba sorkar anendaktsür TR Zeliang’er sorkar kümdaktsü. Ajisüaka, ita ka ana lir, Governor PB Acharya-i osangbener den jembidang iba onükji party sasep indang anungji party tsüngda putepshitsüla ta ashi. Iba tangatetba tamajung aser inyaksangshi khukhua aitsür, ta NPF CEC senden nung adenertemi bangzünga ayu.
Tamil Nadu nungbo Governor, C Vidyasagar Rao-i tanü Opposition lennir pezü dang AIADMK nung temulung masür MLA 19 indang onük nung pa tebang aitsü makok kechiyong parnok AIADMK züngsemtemsa lir ta ashi saka yangi Nagaland nungbo Governor-i iba den meputet inyaker.
NPF-i National Democratic Alliance nungi atsünga maoer kechiyong 1977 küm iba teloktep tenzükertem rongnung NPF dena lir. Ajisüaka, July 18, 2017 nü CEC-i BJP den tesentaktep pilatsü lemtetbabo memelenshir, ta NPF CEC-isa telemtetba agi.
NPF party Constitution kümzüka ayutsü aser tim mesüi mamshitsü atema CEC-i party President Dr Shurhozelie Liezietsu nem Constitution Review Committee ka tentettsü tashi agütsü aser parnoki Constitution nung melenshiba/yanglushiba sülen November 22, 2017 General Convention nung benoktsü akok ta parnokisa lemtet.