NPF CEC-i Naga yimten tekaratiba nung latettsü ayongzüker; Tashi mait sorkar mashii mapang ka nung loksatsü: Dr. Shürhozelie

Kohima, January 31 (TYO): Indo-Naga yimten tebilemtsü atema olemtep nung adenba Naga national political groups (NNPGs) aser India sorkari tekaratiba nung telemtetba ka agitsü atema ayongzüker, ta Opposition Naga People’s Front (NPF)-i metetdaktsü.
Brihostibarnü taküm atema NPF Central Executive Council (CEC) senden mezüngbuba amendang iba temepishiba agütsü.
February 2018 nung India sorkari “Election for solution” ta Naga nunger dang nangzük saka kechiba tanü tashi iba tenangzükba ama mapa meinyaker, ta NPF CEC-i asüngdang.
Nagaland nung political teloktemi “Solution before election” ta yimyim ayimoktsü saka BJP-i iba yimyim tashi manga aser “Election for solution” ta shia election nung tokteptsü atema nomination asü. Iba sülen tanüngba party temia nomination mapa inyak, ta parnokisa ashi.
Nagaland nung alirtemi tesüiba ita 11 tsüngda election ana ajuruogo aser ano election ana- 26 Aonglenden Assembly by-election den the Parliamentary Election agitsü lir, saka BJP-i taoba election nung nangzükba mapa ano meinyak lir.
Naga Peace Talks atema Interlocutor, R. N. Ravi-i “temai adokang mesüra tembangtsü atema rarang” ta ashiba aitsür. Ravi nem yimten latettsü atema lenmang bushitsü mapa nungloktsü saka pai khuret ang bentsür arur, ta CEC-isa ashi.
Rajya Sabha MP NPF candidate K. G. Kenye-i Citizenship Amendment Bill (CAB) 2016 anema vote agütsütsü ta tanü parnokisa nenshia metetdaktsü.
NDPP-i aniba PDA sorkari tanü Chumukedima nung shisalemsatepba senden nung madentsü ta NPF Core Committee-i posema nungiter, kechiyong NDPP-i aniba PDA sorkari Lok Sabha nung CAB benokdang anema menoktak, ta NPF CEC-isa metetdaktsü.
NPF President aser NPF Legislator Party nung Leader nati yimtenren tsütsü telemtetba agitsü atema CEC-i tashi agütsü. Parnokisa NPF President nem 26 Aonglenden A/C by-election, Arunachal Pradesh assembly election aser Parliamentary election ketdangsüa reprangtsü atema committee ka tentettsü tashi agütsü.
Taoba Union Defence Minister George Fernandes asüba atema CEC-i mangyim aser pa politics mapa inyakba mapang NPF-i pa den tesentaktep tajung liasü ta CEC-isa metetdaktsü.
Senden nung NPF President, Dr. Shürhozelie Liezietsu-i o jembidang Nagaland nung regional political party tejentibaji NPF lir ta ashi.
“2018 küm Nagaland nung NPF-i aika ajangshiogo. Asenoki 13 buba General Elections nung tera agi NDPP-BJP teloktep tsüngdang tamakok angu. Ajisüaka, asenoki sasa mebilemer kechiyong asenoki aibelenbatem nangzüktsüla aser tamakok angubaji asen tia ta agizüktsüla” ta Dr. Shürhozelie-i ashi.
NDPP-BJP teloktep ket nung nübo peria mali aser iba jagi JD aser Independent MLA ka ka den NPP candidate 2 teyari agia sorkar kümteta ketdangsür. Iba ama tamendakdak maliba sabang ka mashii mapang ka nung chireptsü, ta paisa metetdaktsü.
NPF MLA 26 liaka, küm aika sülen opposition menden nung mena lir. Iba ya party MLA temi lenisüba sayutsü atema maongka ka lir. NPF MLA temi tenük yoker tajung ka ama dang masü saka tangatetba tajung nung shilem agiba atema tenüngsang agütsür, kechiyong taoba mapang Nagaland Legislative Assembly nung yamai Opposition tashi tait maliasü, ta Dr. Shürhozelie-isa shisem.
Tesüiba küm ka tsüngda NPF MLA tem aser party lennirtemi tashi melulai inyaka aruogo aser osang tajung kaji, mapang balala nungi tanga party tem nungi lennirtem NPF nung adenba lir, ta paisa ashi.
NPF ya Naga nunger maitsü lir aser ajaki agizüktsüsa aser akhümtsübutsüsa Naga yimten melatet tashi NPF-i maneni Naga nunger taginüba atema inyaktsü, ta NPF President-isa metetdaktsü.
Paisa party lennirtem dang party tangatetba nungi masetshii noktaktsü aser mezüng maongka angudang sorkar benzüka inyaktsü renema liang ta ayongzük.
Senden nung mendenji NPF working president Apong Pongener liasü aser working president Dr Huska Yepthomi-i temoatsü meshia sarasadem.
Senden nung MLA C L John-i tesentepertem pela agizük, Rajya Sabha MP & NPF secretary general K G Kenye-i business session ketdangsüa agi aser MLA Dr Chumben Murry-i anküp tepela o jembi.